കണ്ണൂർ: - റേഷൻകാർഡിലെ മാറ്റങ്ങൾക്കായോ പുതിയ റേഷൻകാർഡിനായോ ഇനി സപ്ലൈ ഓഫീസുകളിൽ പോകേണ്ടതില്ല. അപേക്ഷ അംഗീകരിക്കുന്ന മുറയ്ക്ക് റേഷൻ കാർഡുകൾ ഡൗൺലോഡ് ചെയ്യാം. പൊതുവിതരണ വകുപ്പിന്റെ സമ്പൂർണ ഇ-ഓഫീസ് ജില്ലയായി കണ്ണൂർ മാറി. ജില്ലയിലെ തലശ്ശേരി, ഇരിട്ടി, തളിപ്പറമ്പ്, കണ്ണൂർ, പയ്യന്നൂർ എന്നീ താലൂക്ക് സപ്ലൈ ഓഫീസുകളിലെയും കണ്ണൂർ ജില്ലാ സപ്ലൈ ഓഫീസിലെയും ഫയൽനീക്കം പൂർണമായും ഇനി ഇ-ഓഫീസ് സംവിധാനത്തിലായിരിക്കും.
2022 ജനുവരിയോടെ പൊതുവിതരണവകുപ്പിനു കീഴിലെ മുഴുവൻ ഓഫീസുകളും പൂർണമായും ഇ ഓഫീസുകളാകും. എന്നാൽ ഡിസംബർ 23-നകംതന്നെ ജില്ലയിലെ എല്ലാ സപ്ലൈ ഓഫീസുകളും ഇ ഓഫീസുകളായി മാറ്റിയതായി ജില്ലാ സിവിൽ സപ്ലൈസ് ഓഫീസറുടെ ചാർജ് വഹിക്കുന്ന കെ.രാജീവ് അറിയിച്ചു.
ഇ-ഓഫീസ് സംവിധാനം വഴി ഫയൽനീക്കം വേഗത്തിലാക്കാനും സുതാര്യമാക്കാനും സാധിക്കും. ഡിജിറ്റൽ സിഗ്നേച്ചർ വഴി ഉദ്യോഗസ്ഥർക്ക് പരിശോധിക്കുന്നതിനും ഓഫീസ് ഫയലുകൾ സ്റ്റേറ്റ് ഡേറ്റാ സെന്ററിൽ സൂക്ഷിക്കാനും കഴിയും.
പൊതുജനങ്ങൾക്ക് ഓഫീസിൽ വരാതെതന്നെ അപേക്ഷയുടെയും പരാതികളുടെയും തത്‌സ്ഥിതി https://eoffice.kerala.gov.in എന്ന പോർട്ടലിൽ ലഭിക്കും. റേഷൻകാർഡുമായി ബന്ധപ്പെട്ട എല്ലാ അപേക്ഷകളും നിലവിൽ ഓൺലൈനായി അക്ഷയ കേന്ദ്രങ്ങൾ മുഖേനയും സിറ്റിസൺ ലോഗിൻ വഴിയുമാണ് സമർപ്പിക്കേണ്ടത്. ജില്ലാ ബ്രാഞ്ച് മാനേജർ സുചിത്രയുടെ നേതൃത്വത്തിൽ എല്ലാ താലൂക്കുകളിലെയും ജീവനക്കാർക്ക് ഇതുസംബന്ധിച്ച പരിശീലനം നൽകിക്കഴിഞ്ഞു.
