കൊല്ലൂർ മഹാരഥോത്സവ ആഘോഷത്തിന് ഇന്ന് തുടക്കം

മംഗളൂരു :- കൊല്ലൂർ മൂകാംബിക ക്ഷേത്രത്തിലെ മഹാരഥോത്സവ ആഘോഷം ഇന്ന് മാർച്ച്‌ 25 തിങ്കളാഴ്ച തുടങ്ങും. ഏപ്രിൽ ഒന്നിനാണ് മഹാരഥോത്സവം. ക്ഷേത്രമതിൽക്കെട്ടിന് പുറത്ത് മഹാരഥോത്സവത്തിന്റെ ഭാഗമായി തിങ്കളാഴ്ച മുതൽ ഏപ്രിൽ മൂന്നുവരെ പ്രത്യേക ചടങ്ങുകളുണ്ട്. തിങ്കളാഴ്ച രാവിലെ 7.30-ന് ഗണപതി പ്രാർഥന, സിംഹയാഗം എന്നിവ നടക്കും.

ചൊവ്വാഴ്ച രാത്രി ഒൻപതിന് മയൂരാരോഹണോത്സവം, മാർച്ച്‌ 27-ന് ദൂലാരോഹണോത്സവം, 28-ന് പുഷ്പ മണ്ഡപാരോഹണോത്സവം, 29-ന് വൃഷഭാരോഹണോത്സവം, 30-ന് ഗജാരോഹണോത്സവം, 31-ന് രാവിലെ 7.30-ന് ഹിരേരങ്കപൂജ, രാത്രി ഒൻപതിന് സിംഹാരോഹണോത്സവം. ഏപ്രിൽ ഒന്നിന് രാവിലെ 9.30-ന് മുഹൂർത്തബലി, 11.30-ന് രഥാരോഹണം എന്നിവയ്ക്ക് ശേഷം വൈകിട്ട് അഞ്ചിന് മഹാരഥോത്സവം നടക്കും. രണ്ടിന് വൈകിട്ട് ഒക്കൂലി, മൂന്നിന് രാവിലെ 7.30-ന് അശ്വാരോഹണോത്സവം, മഹാപൂർണഹുതി, രാത്രി 9.30-ന് പൂർണകുംഭാഭിഷേകം എന്നീ ചടങ്ങുകളോടെ രഥോത്സവത്തിന് സമാപനമാകും.