.jpg)
തിരുവനന്തപുരം :- ശബരിമല ദർശനത്തിനെത്തുന്ന അയ്യപ്പഭക്തരുടെ ഇരുമുടിക്കെട്ടിൽ ഉൾപ്പെടുത്തേണ്ട സാധനങ്ങൾ എന്തൊക്കെയെന്നു നിർദേശിച്ച് തിരുവിതാംകൂർ ദേവസ്വംബോർഡ് ഉത്തരവിറക്കി. മുൻ, പിൻ കെട്ടുകളിൽ ഉൾപ്പെടുത്തേണ്ട സാധനങ്ങൾ നിശ്ചയിച്ച് ദേവസ്വം ബോർഡ് പ്രസിഡന്റിന് ശബരിമല തന്ത്രി കണ്ഠര് രാജീവര് കത്ത് നൽകിയിരുന്നു.
പ്ലാസ്റ്റിക് ഉൾപ്പെടെയുള്ള സാധനങ്ങൾ കൊണ്ടുവരുന്നത് പരിസ്ഥിതി പ്രശ്നത്തിന് ഇടയാക്കുന്നത് കണക്കിലെടുത്തായിരുന്നു തന്ത്രിയുടെ കത്ത്. ഇതിന്റെ അടിസ്ഥാനത്തിലാണ് ദേവസ്വം ബോർഡിൻ്റെ ഉത്തരവ്. മുൻകെട്ടിൽ ഉണക്കലരി, നെയ്ത്‌തേങ്ങ, ശർക്കര, കദളിപ്പഴം, വെറ്റില, അടയ്ക്ക, കാണിപ്പൊന്ന് എന്നിവയും പിൻകെട്ടിൽ ശബരിമലയിൽ സമർപ്പിച്ച് വെള്ളനിവേദ്യം വാങ്ങാനുള്ള അരി എന്നിവയുമാണ് വേണ്ടത്.
പനിനീർ, ചന്ദനത്തിരി, കർപ്പൂരം എന്നിവ ശബരിമലയിൽ കൊണ്ടുവരാൻ പാടില്ല. ഇരുമുടിക്കെട്ടിൽ ഇപ്പോൾ കൊണ്ടു വരുന്ന സാധനങ്ങളിൽ പലതും ആവശ്യമില്ലാത്തതാണെന്ന് കത്തിൽ പറയുന്നു. ഇരുമുടിയിൽ തന്ത്രി നിർദേശിച്ചതല്ലാത്ത സാധനങ്ങൾ കരുതരുതെന്ന് ദേവസ്വം ബോർഡ് ഉദ്യോഗസ്ഥർക്കും ക്ഷേത്ര മേൽശാന്തിമാർക്കും നിർദേശം നൽകി.
