തിരുവനന്തപുരം :- ഹയർസെക്കൻഡറിയിൽ ഉപരിപഠന യോഗ്യത നേടാത്തവർക്കുള്ള സേവ് എ ഇയർ (സേ) പരീക്ഷയും ഇംപ്രൂവ്മെന്റ് പരീക്ഷയും ജൂൺ 23 മുതൽ 27 വരെ നടക്കും. വിജ്‌ഞാപനം എച്ച്എസ്ഇ പോർട്ടലിൽ പ്രസിദ്ധീകരിച്ചു. പരീക്ഷാ ഫീസ് പിഴ കൂടാതെ 27 വരെയും 600 രൂപ പിഴയോടെ 29വരെയും അടച്ച് അപേക്ഷിക്കാം. പ്ലസ്‌ടു പരീക്ഷയിൽ ഡി പ്ലസ് ഗ്രേഡ് നേടാനാകാത്ത എല്ലാ വിഷയങ്ങൾക്കും സേ പരീക്ഷ എഴുതാം. അതേസമയം ഉപരിപഠന യോഗ്യത നേടിയവർക്ക് ഒരു വിഷയത്തിൽ മാത്രമേ ഇംപ്രൂവ്മെന്റ് പരീക്ഷയെഴുതാൻ കഴിയൂ.
ഹയർസെക്കൻഡറി പരീക്ഷയെഴുതിയ വിദ്യാർഥികൾക്ക് വിദ്യാർഥികൾക്ക് പുനർമൂല്യനിർണയത്തിനും സൂക്ഷ്‌മപരിശോധനയ്ക്കും ഉത്തരക്കടലാസുകളുടെ പകർപ്പിനുമുള്ള അപേക്ഷകൾ പരീക്ഷാകേന്ദ്രങ്ങളിൽ സമർപ്പിക്കാം. അപേക്ഷാഫോം മാതൃക സ്കൂളുകളിലും ഹയർ സെക്കൻഡറി പോർട്ടലിലും ലഭ്യമാണ്. പുനർമൂല്യനിർണയത്തിന് 500 രൂപയും ഉത്തരക്കടലാസുകളുടെ പകർപ്പിന് 300 രൂപയും സൂക്ഷ്‌മപരിശോധനയ്ക്ക് 100 രൂപയുമാണ് പേപ്പറൊന്നിന് ഫീസ്.
ഇരട്ടമൂല്യനിർണയം നടന്ന ഫിസിക്സ്, കെമിസ്ട്രി, കണക്ക് വിഷയങ്ങൾക്ക് പുനർമൂല്യ നിർണയവും സൂക്ഷ്‌മ പരിശോധനയും ഇല്ല. എന്നാൽ ഈ പരീക്ഷകളുടെ ഉത്തരക്കടലാസുകളുടെ പകർപ്പിന് അപേക്ഷിക്കാം. സർട്ടിഫിക്കറ്റ് വിതരണം ജൂലൈയിൽ പൂർത്തിയാക്കുമെന്ന് മന്ത്രി വി.ശിവൻകുട്ടി അറിയിച്ചു.
