തിരുവനന്തപുരം :- വാട്സ്ആപ്പിലൂടെ .apk ഫയലുകൾ അയച്ച് പണം തട്ടുന്ന സംഘം സജീവമാണെന്നും ജാഗ്രത പാലിക്കണമെന്നും മുന്നറിയിപ്പ് നൽകി കേരളാ പോലീസ്. മോട്ടോർ വാഹന വകുപ്പിന്റെ പേരിൽ ട്രാഫിക് ചെല്ലന്റെ എപികെ ഫയലുകൾ അയച്ച് തട്ടിപ്പിന് ശ്രമിച്ചതിന്റെ സ്ക്രീൻഷോട്ട് സഹിതമാണ് പോലീസ് മുന്നറിയിപ്പ് നൽകിയിരിക്കുന്നത്.
മോട്ടോർ വാഹന വകുപ്പിന്റെ പേരിലോ മറ്റോ ഫോണിലേക്ക് എത്തുന്ന ഇത്തരം .apk (അപ്ലിക്കേഷൻ) ഫയലുകളെ സൂക്ഷിക്കണമെന്ന് പോലീസ് അറിയിച്ചു. സുഹൃത്തുക്കളുടെ അക്കൗണ്ടിൽ നിന്നും ഇത്തരം ഫയലുകൾ വന്നേക്കാം. ഒരിക്കലും ഇത്തരം ഫയലുകൾ ഡൗൺലോഡ് ചെയ്യുകയോ ഇൻസ്റ്റാൾ ചെയ്യുകയോ ചെയ്യരുത്. ഇത്തരം ആപ്ലിക്കേഷൻ ഫയൽ ഫോണിൽ ഇൻസ്റ്റാൾ ആയാൽ ഫോണിൻ്റെ നിയന്ത്രണം തട്ടിപ്പുകാർ കയ്യടക്കും. തുടർന്ന് ഫോണിലുള്ള ബാങ്കിങ് ആപ്ലിക്കേഷനുകൾ വഴി അക്കൗണ്ടിലുള്ള പണം തട്ടിയെടുക്കുന്നു. ഫോൺ തട്ടിപ്പുകാരുടെ നിയന്ത്രണത്തിലായതിനാൽ സോഷ്യൽ മീഡിയ അക്കൗണ്ടുകൾ വഴി ഈ അപ്ലിക്കേഷൻ ഫയലുകൾ സുഹൃത്തുക്കൾക്കും അയച്ചു നൽകാനും സാധ്യതയുണ്ട്.
ഓൺലൈൻ സാമ്പത്തിക കുറ്റകൃത്യങ്ങൾക്ക് ഇരയാവുകയോ ശ്രദ്ധയിൽപ്പെടുകയോ ചെയ്താൽ 1930 എന്ന നമ്പറിൽ ബന്ധപ്പെടാം. https://cybercrime.gov.in എന്ന വെബ്സൈറ്റ് വഴിയും പോലീസിനെ വിവരമറിയിക്കാം.
