കമ്പിൽ :- സംഘമിത്ര നാടക പുരസ്കാരത്തിന് പ്രശസ്ത അഭിനേത്രി കണ്ണൂർ സരസ്വതിയെ തെരഞ്ഞടുത്തു.
എം.കെ മനോഹരൻ, സുരേഷ് ബാബു ശ്രീസ്ഥ, ശ്രീധരൻ സംഘമിത്ര തുടങ്ങിയ ജൂറിയാണ് പുരസ്കാര ജേതാവിനെ തെരഞ്ഞെടുത്തത്.
പത്തായിരം രൂപയും ഫലകവും, പ്രശസ്തി പത്രവും അടങ്ങുന്നതാണ് പുരസ്കാരം.
സപ്തംബർ 14 ന് രാവിലെ 10 മണിക്ക്‌ കമ്പിൽ സംഘമിത്ര ഹാളിൽ നടക്കുന്ന നാടക പ്രവർത്തക സംഗമത്തിൽ വെച്ച് പുരസ്കാരം വിതരണം ചെയ്യും.
കേരളത്തിലെ അമേച്വർ - പ്രൊഫഷനൽ നാടക രംഗത്ത് നിറഞ്ഞു നിന്ന അഭിനയ പ്രതിഭയാണ്
കണ്ണൂർ സരസ്വതി. സ്കൂൾ കാലം മുതൽ അഭിനയ രംഗത്തുണ്ട്. അമേച്വർ നാടകരംഗത്ത് ശ്രദ്ധേയമായ സാന്നിധ്യമായിരുന്നു. ഇബ്രാഹിം വേങ്ങരയുടെ ചിരന്തനയിൽ നിന്ന് പ്രൊഫഷനൽ നാടകരംഗത്തെ അഭിനയ യാത്ര തുടങ്ങി.
കണ്ണൂർ സംഘചേതനയുടെ പ്രശസ്ത നാടകമായ സഖാവ് മുതൽ എട്ട് വർഷക്കാലം മികച്ച അഭിനേത്രിയായി പ്രേക്ഷകരുടെ സവിശേഷ
ശ്രദ്ധ പിടിച്ചു പറ്റി. സഖാവിലെ കയ്യൂരിലെ ഉമ്മ എന്ന കഥാപാത്രം മലയാള നാടക ചരിത്രത്തിൻ്റെ ഭാഗമായി. ചരിത്രം അവസാനിക്കുന്നില്ല എന്ന
നാടകത്തിലെ അഭിനയത്തിന് കേരള സംഗീത നാടക അക്കാദമിയുടെ സഹനടിയായി അവാർഡ് കരസ്ഥമാക്കി. ചലചിത്ര നടിയാണ്. ഷോർട്ട് ഫിലിമുകളിലും ശ്രദ്ധേയമായ വേഷം അവതരിപ്പിച്ചു. ജീവിതം മുഴുവൻ മലയാള നാടകവേദിക്ക് സമർപ്പിക്കുകയായിരുന്നു
കണ്ണൂർ സരസ്വതി.
ആകാശവാണി കണ്ണൂർ നിലയം A ഗ്രേഡ് ആർട്ടിസ്റ്റാണ്. 2008 ൽ
കേരള സംഗീത നാടക അക്കാദമിയുടെ ഗുരുപൂജ
അവാർഡ് നേടി. 2018 ൽ സമഗ്രസംഭാവനക്കുള്ള സാവിത്രി ഭായ് ഫൂലെ അവാർഡ് കരസ്ഥമാക്കി.
സവിശേഷമായ അഭിനയ
മികവ് കൊണ്ട് മലയാള നാടകവേദിയെ സമ്പന്നമാക്കിയ കലാകാരിയാണ് കണ്ണൂർ സരസ്വതി.
വാർത്താസമ്മേളനത്തിൽ എ.വി അജയകുമാർ, ശ്രീധരൻ സംഘമിത്ര, എ.കൃഷ്ണൻ, എം.പി രാമകൃഷ്ണൻ, പി.സന്തോഷ് പങ്കെടുത്തു
