തിരുവനന്തപുരം :- മെറ്റയുടെ സോഷ്യൽ മീഡിയ പ്ലാറ്റ്ഫോമുകളിലൊന്നായ ഇൻസ്റ്റഗ്രാമിൽ വമ്പൻ അപ്ഡേറ്റ് വരുന്നു. ഇൻസ്റ്റഗ്രാം ആപ്പിൽ റീൽസ്-ഫസ്റ്റ് (Reels-first) ഫീച്ചർ ഇന്ത്യൻ ഉപഭോക്താക്കൾക്ക് ലഭിച്ചുതുടങ്ങിയതായാണ് റിപ്പോർട്ട്.
ഇൻസ്റ്റഗ്രാം ആപ്പ് തുറന്നാൽ ഇന്റർഫേസിൽ ഹോം ഫീഡിന് പകരം റീൽസ് സെക്ഷൻ ആദ്യ വരുന്ന രീതിയിലാണ് ഈ ലേഔട്ട് അപ്ഡേറ്റ്. ഇൻസ്റ്റഗ്രാം ഡയറക്ട് മെസേജ് (ഡിഎം) കൂടുതൽ എളുപ്പം ആക്സസ് ലഭിക്കുന്ന രീതിയിൽ ഡിസൈനിൽ കാതലായ മാറ്റവും ഇൻസ്റ്റഗ്രാം വരുത്തുന്നുണ്ട്. റീൽസിനും ഡിഎമ്മിനുമായാണ് ഇൻസ്റ്റഗ്രാം കൂടുതലായി ഉപയോഗിക്കുന്നത് എന്നതാണ് ഇത്തരത്തിൽ ആപ്പ് ഡിസൈൻ ചെയ്യാൻ മെറ്റയെ പ്രേരിപ്പിക്കുന്നത്. എന്തൊക്കെയാണ് ഇന്ത്യയിൽ ഇൻസ്റ്റഗ്രാം ആപ്പിലേക്ക് വരുന്ന അപ്ഡേറ്റുകളെന്ന് പരിശോധിക്കാം.
ഇൻസ്റ്റഗ്രാമിൽ റീൽസ്-ഫസ്റ്റ്
ഐപാഡുകളിൽ പരീക്ഷിച്ച ശേഷം ഇന്ത്യയിൽ റീൽസ്-ഫസ്റ്റ് ലേഔട്ട് ഫീച്ചർ അവതരിപ്പിക്കുകയാണ് ഇൻസ്റ്റഗ്രാം. ഇപ്പോൾ പരീക്ഷണ ഘട്ടത്തിലുള്ള ഈ ഫീച്ചർ വ്യാപകമായി എല്ലാ ഇൻസ്റ്റ ഭോക്താക്കൾക്കുമായി ലഭ്യമായിട്ടില്ല.
തെരഞ്ഞെടുക്കപ്പെട്ട ഇൻസ്റ്റഗ്രാം ഉപഭോക്താക്കൾക്ക് മാത്രമാണ് റീൽസ്-ഫസ്റ്റ് ലേഔട്ടിലുള്ള ഇൻസ്റ്റഗ്രാം ആപ്പ് ഇപ്പോൾ ലഭ്യമായിട്ടുള്ളൂ. പേര് സൂചിപ്പിക്കുന്നതുപോലെ ഇൻസ്റ്റഗ്രാം തുറക്കുമ്പോൾ റീൽസ് സെക്ഷൻ ആദ്യം വരുന്ന രൂപത്തിലുള്ള ഇൻ്റർഫേസാണ് ഈ അപ്ഡേറ്റിൻ്റെ പ്രത്യേകത. നിലവിൽ ഇൻസ്റ്റഗ്രാം തുറക്കുമ്പോൾ എല്ലാത്തരം പോസ്റ്റുകളും പ്രത്യക്ഷപ്പെടുന്ന ഹോം ഫീഡിലേക്കാണ് യൂസർമാർ നേരിട്ട് എത്തുന്നത്. എന്നാൽ പുത്തൻ അപ്ഡേറ്റിൽ റീൽസ് സെക്ഷനാണ് ആപ്പ് തുറക്കുമ്പോൾ തന്നെ കാണുക. ഇൻസ്റ്റഗ്രാം ആപ്പിൽ മറ്റ് ചില പ്രധാന മാറ്റങ്ങളും ഇതിനൊപ്പം വരുന്നുണ്ട്.
നിലവിലുള്ളതുപോലെ ഇൻസ്റ്റഗ്രാം സ്റ്റോറീസ് ഫീഡിന്റെ ഏറ്റവും മുകൾവശത്തായി തന്നെ നിലനിർത്തും. ഇൻസ്റ്റ സ്റ്റോറീസിലേക്ക് യൂസർമാർക്ക് എളുപ്പം എത്താൻ കഴിയും വിധമാണ് ഇത് നിലനിർത്തിയിരിക്കുന്നത്. എന്നാൽ ഡിഎമ്മിൽ ഒരു മാറ്റമുണ്ട്. ഇൻസ്റ്റഗ്രാം ഡിഎം സൗകര്യം ഏറ്റവും താഴെയുള്ള നാവിഗേഷൻ ബാറിൻ്റെ മധ്യത്തിലേക്ക് മാറ്റിയിരിക്കുന്നു. ഡിഎം വളരെ പെട്ടെന്ന് ആക്സസ് ചെയ്യാൻ ഇതിലൂടെ കഴിയുമെന്ന് ഇൻസ്റ്റഗ്രാം അധികൃതർ വിശ്വസിക്കുന്നു. ഇൻസ്റ്റഗ്രാമിൽ റീൽസും ഡിഎമ്മുമാണ് കൂടുതൽ പേരും ഉപയോഗിക്കുന്നത് എന്നത് പരിഗണിച്ചാണ് ഈ ഡിസൈൻ മാറ്റമെന്ന് ഇൻസ്റ്റ അധികൃതർ വ്യക്തമാക്കി. എല്ലാ സെക്ഷൻ ടാബുകളും എളുപ്പം സ്വൈപ് ചെയ്യാൻ കഴിയുന്ന വിധത്തിലാണ് ഇൻസ്റ്റഗ്രാമിലെ പുതിയ ഡിസൈൻ ക്രമീകരണം.
ഫോളോയിംഗ് ടാബ് (Following Tab)
ഫോളോയിംഗ് ടാബ് എന്നൊരു സെക്ഷൻ ഇൻസ്റ്റഗ്രാമിലേക്ക് പുതുതായി കൂട്ടിച്ചേർത്തിട്ടുമുണ്ട്. നിങ്ങൾ ഫോളോ ചെയ്യുന്നവരിൽ നിന്നും നിങ്ങളെ ഫോളോ ചെയ്യുന്നവരിൽ നിന്നുമുള്ള പോസ്റ്റുകൾ എളുപ്പത്തിൽ കാണുംവിധമാണ് ഫോളോയിംഗ് ടാബ് ക്രമീകരിച്ചിരിക്കുന്നത്. ഫോളോയിംഗ് ടാബിൽ പ്രവേശിച്ചാൽ മൂന്ന് ഓപ്ഷനുകൾ കാണാം. ഓൾ (AII) എന്ന ഓപ്ഷനിൽ ഒരു യൂസർ ഫോളോ ചെയ്യുവരുടെ പോസ്റ്റുകളും റീലുകളുമാണ് കാണാനാവുക. ഫ്രണ്ട്സ് (Friends) എന്ന ഓപ്ഷനിൽ പരസ്പ‌രം അങ്ങോട്ടുമിങ്ങോട്ടും ഫോളോ ചെയ്യുന്നവരുടെ പോസ്റ്റുകളും റീലുകളും കാണാം. ലേറ്റസ്റ്റ് (Latest) ഇതിൽ നിങ്ങൾ ഫോളോ ചെയ്യുന്നവരുടെ എന്ന ഓപ്ഷനാണ് മൂന്നാമത്തേത്. പോസ്റ്റുകൾ ഏറ്റവും പുതിയവ എന്ന ക്രമത്തിൽ കാണാനാകും.
