ദില്ലി :- ഇ-പാൻ കാർഡ് ഡൗൺലോഡ് ചെയ്യാം എന്ന സബ്ജക്റ്റിൽ വ്യാജ ഇ-മെയിലുകൾ വ്യാപകമാവുന്നു. ഇ-പാൻ കാർഡ് ഓൺലൈനായി ഡൗൺലോഡ് ചെയ്യാനുള്ള സ്റ്റെപ്-ബൈ-സ്റ്റെപ് ഗൈഡ് എന്ന വിവരണത്തോടെയാണ് ഈ ഇ-മെയിലുകൾ വരുന്നത്. എന്നാൽ ഈ ഇ-മെയിൽ വ്യാജമാണെന്നും ക്ലിക്ക് ചെയ്തോ മറുപടി നൽകിയോ ആരും വഞ്ചിതരാവരുതെന്നും പ്രസ് ഇൻഫർമേഷൻ ബ്യൂറോയുടെ (പിഐബി) ഫാക്ട് ചെക്ക് വിഭാഗം അഭ്യർഥിച്ചു.
ഇ-പാൻ കാർഡിന്റെ പേരിൽ സൈബർ തട്ടിപ്പ്
ഇ-പാൻ കാർഡ് ഓൺലൈനായി ഡൗൺലോഡ് ചെയ്യാനുള്ള മാർഗനിർദ്ദേശങ്ങൾ എന്നുപറഞ്ഞാണ് പൊതുജനങ്ങൾക്ക് ഇ-മെയിലുകൾ ലഭിക്കുന്നത്. ആദായനികുതി വകുപ്പ് പുറത്തിറക്കുന്ന ഏറ്റവും പ്രധാന രേഖകളിലൊന്നാണ് പാൻ കാർഡ് എന്ന് ഈ ഇ-മെയിൽ പറയുന്നു. എന്നാൽ, ഇ-പാൻ കാർഡ് ഓൺലൈനായി ഡൗൺലോഡ് ചെയ്യാം എന്ന തരത്തിൽ വരുന്ന ഈ ഇ-മെയിൽ വ്യാജമാണ് എന്നതാണ് യാഥാർഥ്യം എന്ന് പിഐബി ഫാക്ട് ചെക്ക് വ്യക്തമാക്കി. ഇത്തരത്തിൽ വ്യക്തിവിവരങ്ങളും സാമ്പത്തിക വിവരങ്ങളും ആവശ്യപ്പെടുന്ന സംശയാസ്‌പദമായ ഇ-മെയിലുകളോടും ലിങ്കുകളോടും കോളുകളോടും എസ്എംഎസുകളോടും പ്രതികരിക്കരുത് എന്നും പിഐബി അഭ്യർഥിച്ചു. ലഭിക്കുന്ന ലിങ്കുകളിൽ ആരും ക്ലിക്ക് ചെയ്യരുത്. എപികെ ഫയലുകൾ ഇൻസ്റ്റാൾ ചെയ്താൽ സെൻസിറ്റീവായ വിവരങ്ങൾ ചോരുകയും ഹാക്കർമാർ സിസ്റ്റത്തിലേക്ക് നുഴഞ്ഞുകയറുകയും ചെയ്യും. അതിനാൽ എപികെ ഫയലുകളോടും അകലം പാലിക്കുക.
ഇൻകം ടാക്സ് വകുപ്പ് ഇ-മെയിലുകൾ വഴി ഒരിക്കലും വ്യക്തി വിവരങ്ങൾ ആവശ്യപ്പെടാറില്ല എന്നോർക്കുക. പിൻ നമ്പറുകൾ, പാസ്‌വേഡുകൾ, ക്രഡിറ്റ് കാർഡ് ആക്‌സസ് വിവരങ്ങൾ, ബാങ്ക് അക്കൗണ്ട് വിവരങ്ങൾ, മറ്റ് സാമ്പത്തിക അക്കൗണ്ട് വിവരങ്ങൾ എന്നിവ ആദായ നികുതി വകുപ്പ് ഇ-മെയിലിലൂടെ പൊതുജനങ്ങളോട് ആവശ്യപ്പെടാറില്ല.
എങ്ങനെ ഫിഷിംഗ് മെയിൽ റിപ്പോർട്ട് ചെയ്യാം ?
സെൻസിറ്റീവ് വിവരങ്ങൾ തട്ടിയെടുക്കാൻ ലക്ഷ്യമിട്ടുള്ള ഫിഷിംഗ് ശ്രമങ്ങൾ എങ്ങനെ റിപ്പോർട്ട് ചെയ്യണമെന്നും ആദായ നികുതി വകുപ്പ് വിശദീകരിച്ചിട്ടുണ്ട്. ആദായ നികുതി വകുപ്പിന്റേത് എന്ന വ്യാജേനുള്ള ഇ-മെയിലുകൾ ലഭിക്കുകയോ വെബ്സൈറ്റുകൾ ശ്രദ്ധയിൽപ്പെടുകയോ ചെയ്താൽ, ആ വെബ്സൈറ്റിന്റെയും ഇമെയിലിന്റെയും യുആർഎൽ webmanager.incometax .gov.in എന്ന വിലാസത്തിലേക്ക് ๓. incident@cert-in.org.in മെയിൽ ഐഡിയിലേക്ക് ഒരു കോപ്പി വയ്ക്കുകയും ചെയ്യാം. ഇതിന് പുറമെ ആ സന്ദേശമോ, ഇ-മെയിലിന്റെ ഇൻ്റർനെറ്റ് ഹെഡറോ അയക്കുകയുമാവാം. ആരാണ് വ്യാജ മെയിൽ അയച്ചത് അത് കണ്ടെത്താൻ ഏറെ സഹായകമാവുന്ന ഘടകമാണ് ഇന്റർനെറ്റ് ഹെഡർ എന്നത്. പരാതിയോ ഇന്റർനെറ്റ് ഹെഡറോ അയച്ചുകഴിഞ്ഞാൽ പിന്നീട്, നേരത്തെ ലഭിച്ച സംശയാസ്‌പദമായ ഇ-മെയിൽ സൂക്ഷിക്കേണ്ടതില്ല. അത് ഡിലീറ്റ് ചെയ്യുകയാണ് ഏറ്റവും ഉചിതം. ആദായനികുതി വകുപ്പുമായി ബന്ധമില്ലാത്ത ഫിഷിംഗ് മെയിലുകൾ ലഭിച്ചാലും അത് incident@cert-in.org.in എന്ന ഇ-മെയിൽ ഐഡിയിലേക്ക് ഫോർവേഡ് ചെയ്യേണ്ടതാണ്.
