കണ്ണാടിപ്പറമ്പ് :- വടക്കേ മലബാറിലെ പാട്ടുത്സവകാലത്തിന് തുടക്കം കുറിച്ചു കൊണ്ട് നടന്ന കണ്ണാടിപ്പറമ്പ് ശ്രീ ധർമ്മശാസ്താ ക്ഷേത്രത്തിലെ പാട്ടുത്സവത്തിന് പരിസമാപ്തിയായി. കരിയിൽ സതീശൻ നമ്പ്യാർ മരുതായിയുടെ നേതൃത്വത്തിൽ പ്രകൃതിദത്ത വർണങ്ങളായ അരിപ്പൊടി, മഞ്ഞൾപ്പൊടി, കരിപ്പൊടി, ചുവപ്പ് പൊടി, വാകപ്പൊടി എന്നിവ ഉപയോഗിച്ച് ശ്രീ ധർമ്മശാസ്താ സ്വരൂപം കളം വരഞ്ഞു.
തുടർന്ന് അത്താഴപ്പൂജയ്ക്ക് ശേഷം പാട്ടുതറയിലേക്ക് തിരുവായുധമെഴുന്നള്ളത്തും നാഗപ്പാട്ടും തിരിച്ചെഴുന്നെള്ളത്തിന് ശേഷം മേള പ്രദക്ഷിണം, കളം പൂജ, കളം മായ്ക്കൽ, കളത്തിലരി ചടങ്ങോടെ പാട്ടുത്സവം സമാപിച്ചു. പൂജകൾക്ക് ക്ഷേത്രം തന്ത്രി കരുമാരത്തില്ലത്ത് വാസുദേവൻ നമ്പൂതിരിപ്പാട്, മേൽശാന്തി ഇ.എൻ നാരായണൻ നമ്പൂതിരി എന്നിവർ കാർമികത്വം വഹിച്ചു.
