പഴയങ്ങാടി :- മലബാർ ദേവസ്വം ബോർഡിന് കീഴിലെ മാടായിക്കാവിൽ വഴിപാടിന്റെ വ്യാജ രശീതി ഉപയോഗിച്ച് ജീവനക്കാരൻ ധനാപഹരണം നടത്തിയതായി കണ്ടെത്തി. കൗണ്ടർ ഡ്യൂട്ടിയിലുണ്ടായിരുന്നയാളും മലബാർ ദേവസ്വം എംപ്ലോയീസ് യൂണിയൻ (സിഐടിയു) മാടായി ഏരിയാ സെക്രട്ടറിയും ജില്ലാ കമ്മിറ്റി അംഗവുമായ എ.വി അനീഷാണ് (മണി-45) തട്ടിപ്പ് നടത്തിയത്. ഇയാളെ സസ്പെൻഡ് ചെയ്തതായി എക്സിക്യുട്ടീവ് ഓഫീസർ അറിയിച്ചു.
തിങ്കളാഴ്ച ക്ഷേത്രദർശനത്തിനെത്തിയ കർണാടക സ്വദേശിക്ക് നൽകിയ വഴിപാട് രശീതിയുടെ വ്യാജപ്പകർപ്പ് മറ്റൊരാൾക്ക് രശീതിയായി നൽകുകയായിരുന്നു. കർണാടക സ്വദേശിക്ക് നൽകിയ രശീതിയുടെ പകർപ്പെടുക്കുകയും പേര് വൈറ്റ്നർ ഉപയോഗിച്ച് മായ്ക്കുകയും ചെയ്ത ശേഷമായിരുന്നു തട്ടിപ്പ്. സംഭവം പൂജാരിയുടെ ശ്രദ്ധയിൽപ്പെട്ടതോടെയാണ് തട്ടിപ്പ് വിവരം പുറത്തറിഞ്ഞത്. പൂജാരി ഇത് മാനേജരുടെ ശ്രദ്ധയിൽപ്പെടുത്തി. ദേവസ്വം എക്സിക്യുട്ടീവ് ഓഫീസർ സ്ഥലത്തെത്തി പ്രാഥമിക പരിശോധന നടത്തി ക്രമക്കേട് കണ്ടത്തുകയായിരുന്നു. 300 രൂപയുടെ നാല് വ്യാജ രശീതിയാണ് കണ്ടെത്തിയത്.
ഈ രീതിയിൽ തട്ടിപ്പ് നടത്താൻ തുടങ്ങിയിട്ട് എത്രകാലമായെന്ന് കൂടുതൽ അന്വേഷണത്തിലൂടെ മാത്രമെ അറിയാനാകൂ എന്ന് അധികൃതർ പറഞ്ഞു. വാദ്യകലാകാരനായ അനീഷിന് അടുത്ത കാലത്താണ് കൗണ്ടർ ഡ്യൂട്ടിയിൽ സ്ഥാനക്കയറ്റം ലഭിച്ചത്. ബില്ലടിക്കുമ്പോൾ സാങ്കേതികത്തകരാർ ഉണ്ടാവുകയോ ഭക്തരുടെ കൈയിൽ നിന്ന് ക്ഷേത്രദർശനത്തിന് മുന്നേ രശീതി നഷ്ടപ്പെടുകയോ ചെയ്താൽ നിയമപ്രകാരം രശീതിയു ടെ പകർപ്പെടുക്കാൻ അനുവാദമുണ്ട്. ഈ പഴുത് ഉപയോഗപ്പെടുത്തിയാണ് ഇയാൾ തട്ടിപ്പ് നടത്തിയത്. കൗണ്ടർ ജോലി ചെയ്യുന്ന ജീവനക്കാർ പ്രത്യേകം പാസ് വേഡ് ഉപയോഗിച്ചാണ് കംപ്യൂട്ടറിൽ രശീതി തയ്യാറാക്കുക. തിരക്കേറിയ വേളകളിൽ കൗണ്ടറിൽ ജോലിചെയ്യുന്നവർ ഭക്തജനത്തിരക്കൊഴിവാക്കാൻ മാറി മാറി സേവനം ചെയ്യാറുണ്ട്.
സാധാരണഗതിയിൽ നാല് കൗണ്ടറുകളും ഒരേ സമയത്ത് പ്രവർത്തിക്കുന്ന വേളയിൽ ഇത്തരം ധനാപഹരണത്തിനുള്ള സാധ്യത കുറവാണെന്ന് ബന്ധപ്പെട്ടവർ പറയുന്നു. കൗണ്ടറിൽ ഒരാൾ മാത്രമുള്ളപ്പോഴാണ് തട്ടിപ്പ് നടന്നതെന്നാണ് പ്രാഥമിക വിലയിരുത്തൽ. ക്ഷേത്രപാലകന് ചാർത്തിയ സ്വർണമാല അല്പസമയത്തിന് ശേഷം കാണാതായ സംഭവം ഇവിടെയുണ്ടായിട്ടുണ്ട്. ഈ സംഭവത്തിൽ രണ്ട് ജീവനക്കാർ സസ്പെൻഷനിലാണ്. ഭണ്ഡാരത്തിലെ തുക എണ്ണിത്തിട്ടപ്പെടുത്തുന്ന വേളയിൽ പണം കവരാൻ ശ്രമിച്ചതുമായി ബന്ധപ്പെട്ട് ഒരാൾ ശിക്ഷാനടപടിക്ക് വിധേയനായതും സമീപകാലത്താണ്.
