ന്യൂഡൽഹി :- ഓൺലൈൻ പ്ലാറ്റ്ഫോമുകളിൽ അശ്ലീല സ്വഭാവമുള്ള ഉള്ളടക്കം കാണുന്നവരുടെ പ്രായം പരിശോധിക്കാൻ ആധാർ ഉപയോഗപ്പെടുത്താൻ കഴിയുമോയെന്നു സുപ്രീംകോടതി സർക്കാരിനോടു ചോദിച്ചു. ഓൺലൈൻ പ്ലാറ്റ്ഫോമുകളിലെ അശ്ലീല, നിയമവിരുദ്ധ ഉള്ളടക്കം നിയന്ത്രിക്കാൻ സ്വതന്ത്ര സ്വയംഭരണാധികാര സംവിധാനം വേണമെന്നു നിരീക്ഷിച്ചുകൊണ്ടാണ് ഇക്കാര്യം ചോദിച്ചത്. നിലവിലെ സ്വയം നിയന്ത്രണ രീതിയിൽ ചീഫ് ജസ്റ്റിസ് സൂര്യകാന്ത് അത്യപ്‌തി രേഖപ്പെടുത്തുകയും ചെയ്തു.
'ഇന്ത്യ ഗോട്ട് ലേറ്റൻ്റ്' ഷോയിൽ യുട്യൂബർ രൺവീർഅലാബാദി നടത്തിയ അശ്ലീല പരാമർശവുമായി ബന്ധപ്പെട്ട കേസ് പരിഗണിക്കവേയാണിത്. നിയന്ത്രണവുമായി ബന്ധപ്പെട്ട മാർഗനിർദേശത്തിന്റെ കരടു പ്രസിദ്ധീകരിക്കാനും വിഷയം പഠിക്കാൻ വിദഗ്ധരുടെ സമിതി രൂപീകരിക്കാനും ബെഞ്ച് നിർദേശിച്ചു. ഹർജി നാലാഴ്ചയ്ക്കു ശേഷം പരിഗണിക്കാനായി മാറ്റി. ഇക്കാര്യത്തിൽ കേന്ദ്ര സർക്കാർ ചില മാർഗരേഖകൾ പുറപ്പെടുവിച്ചിട്ടുണ്ടെന്ന് അറ്റോർണി ജനറൽ ആർ. വെങ്കിട്ടരമണി കോടതിയെ അറിയിച്ചു.
അശ്ലീലത്തിന്റെ മാത്രം പ്രശ്‌നമല്ലെന്നും യുട്യൂബ് ചാനലുകളിലെ തോന്ന്യാസത്തിന്റെ പ്രശ്ന‌വും ഇതിലുണ്ടെന്നു സോളിസിറ്റർ ജനറൽ തുഷാർ മേത്ത പറഞ്ഞു. അഭിപ്രായ സ്വാതന്ത്യത്തിന്റെ വിഷയമുള്ളതിനാൽ മാർഗരേഖ അന്തിമമാക്കും മുൻപ് വിവിധ കക്ഷികളിൽ നിന്ന് അഭിപ്രായം തേടണമെന്ന് അഭിഭാഷകനായ പ്രശാന്ത് ഭൂഷൺ പറഞ്ഞു. അഭിപ്രായ സ്വാതന്ത്ര്യം ബഹുമാനിക്കപ്പെടേണ്ടതാണെന്നും മുതിർന്നവർക്കു മാത്രമുള്ള ഉള്ളടക്കമുണ്ടെങ്കിൽ അക്കാര്യം മുന്നറിയിപ്പായി നൽകാൻ ശ്രദ്ധിക്കണമെന്നും ചീഫ് ജസ്റ്റിസ് പറഞ്ഞു.
