ഇടുക്കി :- സംസ്കാര ചടങ്ങിനായി കുഴിയെടുക്കുന്നതിനിടെ കോൺക്രീറ്റ് സ്ലാബ് വീണ് അപകടം. അപകടത്തിൽ ഒരാൾ മരിച്ചു. ഇടുക്കി വണ്ടിപ്പെരിയാർ മൂങ്കലാറിൽ ഇന്ന് ഉച്ചയോടെയാണ് സംഭവം. മുങ്കലാർ സ്വദേശി കറുപ്പസ്വാമി (50) ആണ് മരിച്ചത്. കഴിഞ്ഞ ദിവസം മൂങ്കലാറിലെ വ്യാപാരിയായ പൊന്നുസ്വാമി കുഴഞ്ഞുവീണു മരിച്ചിരുന്നു. ഇയാളുടെ മൃതദേഹം സംസ്‌കരിക്കുന്നതിനായി മൂങ്കലാർ പൊതുസ്‌മശാനത്തിൽ കുഴിയെടുക്കുന്നതിനിടെയാണ് സംഭവം. പൊന്നുസ്വാമിയുടെ ബന്ധുക്കളെ അടക്കം ചെയ്‌ത സ്ഥലത്ത് തന്നെ. കുഴിയെടുക്കാനാണ് നിർദേശിച്ചിരുന്നത്. കറുപ്പസ്വാമിയും അയ്യപ്പൻ എന്ന മറ്റൊരാളുമാണ് കുഴിയെടുത്തത്.
അയ്യപ്പൻ കുഴിയുടെ മുകളിലും കറുപ്പസ്വാമി കുഴിക്കുള്ളിലും നിൽക്കുന്നതിനിടെയാണ് സംഭവം. കുഴിയെടുത്ത് പൂർത്തിയാക്കി വൃത്തിയാക്കുന്നതിനിടെ തൊട്ടു സമീപത്തെ കല്ലറയിലെ കോൺക്രീറ്റ് സ്ലാബും അതിനുമുകളിൽ പതിച്ച ഗ്രാനൈറ്റും കുഴിയിലേക്ക് വീഴുകയായിരുന്നു. കുഴിയിൽ നിൽക്കുകയായിരുന്ന കറുപ്പസ്വാമിയുടെ മുകളിലേക്കാണ് സ്ലാബ് വീണത്. സ്ലാബിനടിയിൽപ്പെട്ട കറുപ്പസ്വാമിയെ സ്ഥലത്തുണ്ടായിരുന്നവർ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഭാരമേറിയ കോൺക്രീറ്റ് കൂടുതൽ ആളുകൾ എത്തിയശേഷമാണ് ഉയർത്താനായത്. മൃതദേഹം വണ്ടിപ്പെരിയാർ ആരോഗ്യകേന്ദ്രത്തിലേക്ക് മാറ്റി. ഇടുക്കി മെഡിക്കൽ കോളേജിലെത്തിച്ച് പോസ്റ്റ്മോർട്ടം നടത്തിയശേഷം ബന്ധുക്കൾക്ക് വിട്ടുനൽകും.
