അശ്രദ്ധമായും അമിത വേഗത്തിലുമുള്ള ഡ്രൈവിങ് അപകടങ്ങൾ കൂട്ടുന്നു ; നടപടിയെടുക്കണമെന്നാവശ്യപ്പെട്ട് ഭക്ഷണവിതരണ കമ്പനികൾക്ക് നോട്ടീസ് നൽകി ഗതാഗത കമ്മിഷണർ

തിരുവനന്തപുരം :- അശ്രദ്ധമായും അമിത വേഗത്തിലുമുള്ള ഡ്രൈവിങ് അപകടത്തിനു കാരണമാകുന്നുവെന്നും റോഡ് സുരക്ഷയ്ക്കു പ്രാധാന്യം നൽകാൻ നടപടിയെടുക്കണമെന്നും ആവശ്യപ്പെട്ട് ഓൺലൈൻ ഭക്ഷണവിതരണ കമ്പനികൾക്കു ഗതാഗത കമ്മിഷണർ നോട്ടിസ് നൽകി. 15 ദിവസത്തിനകം നടപടിയെടുത്ത് അറിയിക്കാനാണു നോട്ടിസ് നൽകിയത്. 

ഓൺലൈൻ കമ്പനികളിലെ ജീവനക്കാർ വളരെ കുറഞ്ഞ സമയത്തിനുള്ളിൽ സാധനം എത്തിക്കുന്നതിന് ഒരു സുരക്ഷാ മാനദണ്ഡവും പാലിക്കാതെ അമിതവേഗത്തിൽ ഇരുചക്രവാഹനം ഓടിക്കുന്നതായി ഗതാഗത കമ്മിഷണറുടെ നോട്ടിസിലുണ്ട്. വിപണിയിലെ മത്സരം കൂടിയതിനാൽ സാധനമെത്തിക്കാൻ ഇവർക്ക് യാഥാർഥ്യബോധമില്ലാത്ത സമയപരിധിയാണു കമ്പനികൾ നിശ്ചയിക്കുന്നത്. ഇത് റോഡ് സുരക്ഷയ്ക്കു ഭീഷണിയാണെന്നും നോട്ടിസിൽ വിശദീകരിക്കുന്നു.