കാലിഫോർണിയ :- ഇൻസ്റ്റന്റ് മെസേജിംഗ് ആപ്ലിക്കേഷനായ വാട്സ്ആപ്പിലെ ഗ്രൂപ്പുകളിൽ മൂന്ന് പുത്തൻ ഫീച്ചറുകൾ അവതരിപ്പിച്ച് മെറ്റ. വാട്സ്ആപ്പ് ഗ്രൂപ്പുകളിൽ അംഗങ്ങളുടെ ടാഗ് ചേർക്കാനുള്ള സൗകര്യം, കസ്റ്റം ടെക്സ്റ്റ് സ്റ്റിക്കറുകൾ, മെച്ചപ്പെട്ട ഇവന്റ് റിമൈൻഡറുകൾ എന്നിവയാണ് എത്തിത്തുടങ്ങിയ പുത്തൻ ഫീച്ചറുകൾ. ഘട്ടം ഘട്ടമായി ഈ സവിശേഷതകൾ കൂടുതൽ വാട്സ്ആപ്പ് ഉപഭോക്താക്കൾക്ക് ലഭ്യമാകും. ഗ്രൂപ്പ് ചാറ്റുകൾ മാനേജ് ചെയ്യാനും അംഗങ്ങൾക്ക് പിന്തുടരാനും കൂടുതൽ എളുപ്പമാക്കുന്നതിന്റെ ഭാഗമായാണ് ഈ അപ്ഡേറ്റുകൾ എന്ന് വാട്സ്ആപ്പ് അറിയിച്ചു. ലാർജ് ഫയൽ ഷെയറിംഗ്, എച്ച്ഡി മീഡിയ, സ്ക്രീൻ ഷെയറിംഗ്, വോയിസ് ചാറ്റ് തുടങ്ങിയ സവിശേഷതകൾക്ക് പുറമെയാണ് ഈ മൂന്ന് ഫീച്ചറുകൾ കൂടി വാട്സ്ആപ്പ് ഗ്രൂപ്പുകളിലേക്ക് വരുന്നത്.
1. മെമ്പർ ടാഗ്
ഒരു വാട്സ്ആപ്പ് ഗ്രൂപ്പിൽ അംഗങ്ങൾക്ക് അവരുടെ ചുമതല രേഖപ്പെടുത്താനുള്ള സൗകര്യമാണ് മെമ്പർ ടാഗ് എന്ന് വിളിക്കപ്പെടുന്നത്. ഉദാ: നിങ്ങൾ അംഗമായ ക്രിക്കറ്റ് ടീമിന്റെ വാട്സ്ആപ്പ് ഗ്രൂപ്പിൽ നിങ്ങളുടെ പേരിന് നേർക്ക് ക്യാപ്റ്റൻ എന്നോ വിക്കറ്റ് കീപ്പർ എന്നോ ബാറ്റർ എന്നോ ബൗളർ എന്നോ ഓൾറൗണ്ടർ എന്ന ചേർക്കാം. ഒരു സ്കൂളിലെ വിദ്യാർഥികളുടെ മാതാപിതാക്കളുടെ വാട്സ്ആപ്പ് ഗ്രൂപ്പിൽ ഓരോ കുട്ടിയുടെയും പേര് സഹിതം അധ്യാപകർക്ക് മെമ്പർ ടാഗ് നൽകാം. നിങ്ങളുടെ പേരിന് തൊട്ട് താഴെയായിരിക്കും ഈ ടാഗ് തെളിയുക. ഇങ്ങനെ നൽകുന്ന ടാഗുകൾ ആ നിശ്ചിത ഗ്രൂപ്പിൽ മാത്രമേ തെളിയുകയുള്ളൂ. ഓരോ വാട്സ്ആപ്പ് ഗ്രൂപ്പിലും നിങ്ങൾക്ക് വ്യത്യസ്ത മെമ്പർ ടാഗുകൾ ആഡ് ചെയ്യാൻ കഴിയും. ഗ്രൂപ്പ് ചാറ്റിൽ മെസേജുകളോ വോയിസ് സന്ദേശങ്ങളോ അയക്കുന്നത് ആരെന്ന് എളുപ്പം മനസിലാകാനും ഗ്രൂപ്പ് മോഡറേറ്റർമാർക്ക് അവരുടെ റോൾ നന്നായി നിറവേറ്റാനും ഈ ഫീച്ചർ ഉപകരിക്കും. അംഗങ്ങൾക്ക് പരസ്പരം അറിയാത്തതും ഏറെ ആളുകളുള്ളതുമായ വാട്സ്ആപ്പ് ഗ്രൂപ്പുകളിൽ ഈ ഫീച്ചർ ഏറെ ഗുണം ചെയ്യും.
2. ടെക്സ്റ്റ് സ്റ്റിക്കറുകൾ
നിങ്ങൾക്ക് ടൈപ്പ് ചെയ്ത ഏത് വാക്കും സ്റ്റിക്കറുകളാക്കി മാറ്റാൻ വാട്സ്ആപ്പ് ഗ്രൂപ്പുകളിൽ ഇനിയാകും. ഇങ്ങനെ സൃഷ്ടിക്കുന്ന ടെക്സ്റ്റ് സ്റ്റിക്കറുകൾ സുഹൃത്തുക്കൾക്ക് അയക്കുകയും, സ്റ്റിക്കർ പാക്കിൽ നേരിട്ട് സേവ് ചെയ്യുകയുമാവാം. ഗ്രൂപ്പ് സംഭാഷണങ്ങൾ കൂടുതൽ രസകരമാക്കുന്ന ഈ ഫീച്ചർ വ്യക്തികൾ തമ്മിൽ ആത്മബന്ധം കൂട്ടുന്നതിനും വഴിവെക്കുമെന്നാണ് വാട്സ്ആപ്പ് അധികൃതരുടെ പ്രതീക്ഷ.
3. ഇവന്റ് റിമൈൻഡറുകൾ
ഒരു ഗ്രൂപ്പ് ചാറ്റിൽ ഇവന്റ് ക്രിയേറ്റ് ചെയ്യുമ്പോൾ ഇനി മുതൽ മുൻകൂട്ടി കസ്റ്റമൈസ്ഡ് റിമൈൻഡറുകൾ സെറ്റ് ചെയ്യാനാകും. ഇത് ഗ്രൂപ്പ് അംഗങ്ങൾക്ക് ഇവന്റ്/മീറ്റിംഗ് എന്നിവ മിസ്സാവാതെ പങ്കെടുക്കാനും അതിനായുള്ള പദ്ധതികൾ ആസൂത്രണം ചെയ്യാനും എളുപ്പമാക്കും.
