കുറ്റ്യാട്ടൂർ:- കുറ്റ്യാട്ടൂർ ഗ്രാമപഞ്ചായത്ത് 14-ാം വാർഡായ കരിമ്പുങ്കര പ്രദേശത്ത് അനധികൃതമായി മാലിന്യം തള്ളിയ സംഭവത്തിൽ കർശന നടപടിയുമായി ജനപ്രതിനിധികളും നാട്ടുകാരും. കണ്ണൂരിലെ ഫാമിലി സെന്ററിന്റെ മാലിന്യമാണ് ഇവിടെ തള്ളിയത്.
വിവരമറിഞ്ഞെത്തിയ ഗ്രാമപഞ്ചായത്ത് പ്രസിഡന്റ് നിജിലേഷ് പറമ്പൻ, വൈസ് പ്രസിഡന്റ് എം.വി. സുശീല, പഞ്ചായത്തംഗങ്ങളായ കെ. അച്ചുതൻ, കെ.പി. നാരായണൻ, 16-ാം വാർഡ് കൺവീനർ കെ.വി. പ്രതീഷ്, പി.പി. സജീവൻ എന്നിവരുടെ നേതൃത്വത്തിലുള്ള നാട്ടുകാർ ചേർന്ന് മാലിന്യം തള്ളിയ വാഹനം തടഞ്ഞുനിർത്തി പിടികൂടുകയായിരുന്നു.
തുടർന്ന് അധികൃതർ സ്ഥലത്തെത്തിച്ച് തള്ളിയ മാലിന്യം ഇവർ തന്നെ തിരിച്ചെടുപ്പിച്ചു. കൂടാതെ സ്ഥാപനത്തിന് മേൽ പിഴയും ചുമത്തി. പഞ്ചായത്തിൽ അനധികൃതമായി മാലിന്യം തള്ളുന്നവർക്കെതിരെ ശക്തമായ നിയമനടപടികൾ തുടരുമെന്ന് പഞ്ചായത്ത് അധികൃതർ അറിയിച്ചു.
