കോഴിക്കോട്:- മലയാള സിനിമയിലും നാടകവേദിയിലും ഒരുപോലെ തിളങ്ങിയ പ്രശസ്ത നടിയും ദേശീയ-സംസ്ഥാന പുരസ്കാര ജേതാവുമായ സാവിത്രി ശ്രീധരൻ (83) അന്തരിച്ചു. വാർധക്യസഹജമായ അസുഖങ്ങളെത്തുടർന്ന് കോഴിക്കോട് മാങ്കാവിലെ വസതിയിലായിരുന്നു അന്ത്യം. നാല് പതിറ്റാണ്ടിലേറെക്കാലം നാടകരംഗത്ത് സജീവ സാന്നിധ്യമായിരുന്ന അവർ, 'സുഡാനി ഫ്രം നൈജീരിയ' എന്ന ചിത്രത്തിലെ ഉമ്മയുടെ വേഷത്തിലൂടെയാണ് ചലച്ചിത്ര ലോകത്തും പ്രശസ്തയായത്.
കെ.ടി. മുഹമ്മദിന്റെ കലിംഗ, കോഴിക്കോട് ചിരന്തന, സംഗമം, സ്റ്റേജ് ഇന്ത്യ തുടങ്ങിയ പ്രമുഖ നാടകസമിതികളുടെ ആയിരക്കണക്കിന് നാടകങ്ങളിൽ ശക്തമായ കഥാപാത്രങ്ങളെ അവർ അവതരിപ്പിച്ചിട്ടുണ്ട്. 1977-ലും 1993-ലും മികച്ച നടിക്കുള്ള സംസ്ഥാന നാടക അവാർഡ് നേടിയിട്ടുണ്ട്. എം.ടി. വാസുദേവൻ നായരുടെ 'കടവ്' എന്ന ചിത്രത്തിലൂടെയാണ് സിനിമയിലെത്തിയത്. തുടർന്ന് വലിയങ്ങാടി, ഡാകിനി, മേരാ നാം ഷാജി, വൈറസ്, ഇട്ടിമാണി: മെയ്ഡ് ഇൻ ചൈന, പട, പപ്പൻ തുടങ്ങി നിരവധി ചിത്രങ്ങളിൽ അഭിനയിച്ചു.
മികച്ച നാടക നടിക്കുള്ള പുരസ്കാരങ്ങൾക്ക് പുറമേ, സംഗീത നാടക അക്കാദമി അവാർഡ്, 'സുഡാനി ഫ്രം നൈജീരിയ'യിലെ അഭിനയത്തിന് ദേശീയ ചലച്ചിത്ര അവാർഡിൽ പ്രത്യേക പരാമർശം, മികച്ച നടിക്കുള്ള സംസ്ഥാന ചലച്ചിത്ര പുരസ്കാരം എന്നിവയും അവർ കരസ്ഥമാക്കിയിട്ടുണ്ട്.
