കോഴിക്കോട് :- അധ്യാപകർ പ്രതികളായ പേരാമ്പ്ര എംഡിഎംഎ കേസിൽ സർവശിക്ഷ കേരള കോഴിക്കോട് ജില്ലാ പ്രൊജക്ട് കോർഡിനേറ്റർ അബ്ദുൾ ഹക്കീമിനെതിരെ വിജിലൻസ് അന്വേഷണം. അധ്യാപകരുടെ നിയമനത്തിലും, പുനർ നിയമനത്തിലും വിദേശ യാത്രയിലും ഉൾപ്പെടെയാണ് അന്വേഷണം. അനധികൃത സ്വത്ത് സമ്പാദനം, ഔദ്യോഗിക പദവി ദുരുപയോഗം എന്നീ ആരോപണങ്ങളിലാണ് അന്വേഷണം.
യൂത്ത് കോൺഗ്രസ് സംസ്ഥാന ജനറൽ സെക്രട്ടറി വി.പി ദുൽഖിഫിലാണ് പരാതിക്കാരൻ. എംഡിഎംഎ കേസിൽ പ്രതികളായ മൂന്ന് അധ്യാപികമാരും പേരാമ്പ്ര ബിആർസിക്ക് കീഴിൽ കരാർ അടിസ്ഥാനത്തിൽ നിയമനം ലഭിച്ചവർ. കരാർ കാലാവധി അവസാനിച്ചതിന് പിന്നാലെ ഇവരിൽ രണ്ടുപേരെ വീണ്ടും നിയമിച്ചതിൽ എസ്.എസ്.കെ. ജില്ലാ പ്രൊജക്ട് കോർഡിനേറ്റർ അബ്ദുൾ ഹക്കീമിന് പങ്കുണ്ടെന്നാണ് പരാതി. എംഡിഎംഎ കേസുമായി ബന്ധമുണ്ടോയെന്നും അന്വേഷിക്കണം പരാതിയിൽ വിജിലൻസ് അന്വേഷണം തുടങ്ങി. ദുൽഖിഫിലിനെ വിളിച്ചുവരുത്തി മൊഴിയെടുത്തു. അബ്ദുൾ ഹക്കീമിനെ ഉടൻ ചോദ്യം ചെയ്യും. ബിആർസിയിലെ രേഖകൾ പരിശോധിക്കും. പിടിയിലായ അധ്യാപികമാർക്ക് ഹക്കീമുമായി സാന്‌പത്തിക ഇടപാടുണ്ടോയെന്നും പരിശോധിക്കും
