തിരുവനന്തപുരം :- ഏപ്രിൽ എട്ടു വരെ സംസ്ഥാനത്ത് താപനില സാധാരണയെക്കാൾ രണ്ട് ഡിഗ്രി മുതൽ നാല് ഡിഗ്രി വരെ കൂടാൻ സാധ്യതയുണ്ടെന്ന് കേന്ദ്ര കാലാവസ്ഥാവകുപ്പ് മുന്നറിയിപ്പു നൽകി. ഉയർന്ന താപനിലയും ഈർപ്പമുള്ള വായുവും കാരണം മലയോരമേഖലകളിലൊഴികെ ചൂടും അസ്വസ്ഥതയുമുള്ള കാലാവസ്ഥയ്ക്കു സാധ്യതയുണ്ട്.
ഈ മാസം എട്ടു വരെ കൊല്ലം, പാലക്കാട് ജില്ലകളിലെ ഉയർന്ന താപനില 39 ഡിഗ്രി വരെയും തൃശ്ശൂർ, കോഴിക്കോട് ജില്ലകളിലെ ഉയർന്ന താപനില 38 ഡിഗ്രി വരെയും ആയേക്കാം. പത്തനംതിട്ട, കോട്ടയം, കണ്ണൂർ എന്നിവിടങ്ങളിൽ ഉയർന്ന താപനില 37 ഡിഗ്രി വരെ ഉയരാം. തിരുവനന്തപുരം, ആലപ്പുഴ, എറണാകുളം, മലപ്പുറം, കാസർകോട് എന്നിവിടങ്ങളിൽ താപനില 36 ഡിഗ്രി വരെ ഉയരാനും സാധ്യതയുണ്ടെന്ന് കാലാവസ്ഥാവകുപ്പ് അറിയിച്ചു.
