തിരുവനന്തപുരം : പ്ലസ്‌ടു സേ, ഇംപ്രൂവ്മെന്റ് പരീക്ഷ ജൂൺ 12 മുതൽ 20 വരെ നടക്കും. ഇതിനുള്ള അപേക്ഷ ഇന്നു മുതൽ മെയ് 15 വരെ സമർപ്പിക്കാം. ഇതേ തീയതികളിൽ തന്നെ വി.എച്ച്.എസ്.ഇ സേ, ഇംപ്രൂവ്മെൻ്റ് പരീക്ഷകൾക്കുള്ള അപേക്ഷയും നൽകാം. പരീക്ഷകൾ ജൂൺ 12-ന് തുടങ്ങും. പുനർമൂല്യനിർണയത്തിനും സൂക്ഷ്മ പരിശോധനയ്ക്കും ഉത്തരക്കടലാസുകളുടെ പകർപ്പിനും 14 വരെ അപേക്ഷിക്കാം. ഇരട്ട മൂല്യനിർണയം നടന്ന ഫിസിക്സ്, കെമിസ്ട്രി, കണക്ക് വിഷയങ്ങളിൽ പുനർമൂല്യനിർണയവും സൂക്ഷ്മ പരിശോധനയുമില്ല. ഉത്തരക്കടലാസുകളുടെ പകർപ്പിന് അപേക്ഷിക്കാം.
അപേക്ഷ ഡയറക്ടറേറ്റിൽ നേരിട്ടു സ്വീകരിക്കില്ല. അവരവർ രജിസ്റ്റർചെയ്ത കേന്ദ്രങ്ങളിലാണ് സമർപ്പിക്കണ്ടത്. അപേക്ഷാഫോറങ്ങളുടെ മാതൃക സ്കൂളിലും ഹയർ സെക്കൻഡറി പോർട്ടലിലും ലഭിക്കും. പുനർമൂല്യനിർണയത്തിന് പേപ്പർ ഒന്നിന് 500 രൂപയും ഉത്തരക്കടലാസുകളുടെ പകർപ്പിന് 300 രൂപയും സൂക്ഷ്മ പരിശോധനയ്ക്ക് 100 രൂപയുമാണ് ഫീസ്. വി.എച്ച്.എസ്.ഇ. ഉത്തരക്കടലാസുകളുടെ സൂക്ഷ്മപരിശോധനയ്ക്കും പുനർമൂല്യനിർണയത്തിനുമുള്ള അപേക്ഷകൾ അതതു സ്കൂളിൽ 14-നകം സമർപ്പിക്കണം.
