തീവണ്ടിയുടെ ശൗചാലയത്തിൽ കുടുങ്ങിയ നാലരവയസ്സുകാരിയെ പൂട്ട് പൊളിച്ച് പുറത്തെത്തിച്ചു

കണ്ണൂർ :- ഏറനാട് എക്സ്‌പ്രസിൻ്റെ ശൗചാലയത്തിനുള്ളിൽ നാലര വയസ്സുള്ള പെൺകുട്ടി കുടുങ്ങി. ടവർ ബോൾട്ട് തുറക്കാനാകാത്തതായിരുന്നു കാരണം. വ്യാഴാഴ്ച രാവിലെ 9.20-ന് മംഗളൂരു-തിരുവനന്തപുരം ഏറനാട് എക്സ്പ്രസിൽ പഴയങ്ങാടിയിലാണ് പൂട്ട് പൊളിച്ച് കുട്ടിയെ പുറത്തെത്തിച്ചത്. 20 കിലോമീറ്ററോളം ദൂരം കുട്ടി പേടിച്ച് നിലവിളിച്ചു. പഴയങ്ങാടി സ്റ്റേഷനിൽ നിന്ന് പിന്നിലെ ജനറൽ കോച്ചിൽ ഹിന്ദി സംസാരിക്കുന്ന കുടുംബത്തോടൊപ്പമാണ് കുട്ടി കയറിയത്. ഒറ്റയ്ക്ക് ശൗചാലയത്തിൽ പോയ കുട്ടി ഉള്ളിൽ കയറി വാതിൽ ബോൾട്ടിട്ടു. പിന്നിട് വാതിൽ തുറക്കാനാകാതെ കുട്ടി നിലവിളിച്ചു. 

പുറത്ത് രക്ഷിതാക്കളുടെ കരച്ചിലായി. യാത്രക്കാർ അറിയിച്ചതിനെത്തുടർന്ന് 9.52-ന് കണ്ണൂർ റെയിൽവേ സ്റ്റേഷനിൽ വണ്ടി എത്തിയപ്പോൾ റെയിൽവേ അധികൃതർ കാത്തുനിന്നിരുന്നു. മെക്കാനിക്കൽ വിഭാഗം പൂട്ടുപൊളിച്ച് കുട്ടിയെ പുറത്തെത്തിച്ചു. വ്യാഴാഴ്ച രാവിലെ 11.45-ന് മംഗളൂരു-കോയമ്പത്തൂർ എക്പ്രസിലും (16324) ഒരു കുട്ടി ശൗചാലയത്തിൽ കുടുങ്ങി. വണ്ടി കണ്ണൂർ എത്തുന്നതിന് മുമ്പായിരുന്നു സംഭവം. കുറെ പരിശ്രമിച്ച് കുട്ടി തന്നെ വാതിൽ തുറന്ന് പുറത്തെത്തി.