കോഴിക്കോട് :- കണ്ണൂരിനും ഷൊർണൂരിനുമിടയിൽ രാവിലെയും വൈകീട്ടുമുള്ള യാത്ര ദുരിതത്തിന് ഒരുപരിധിവരെ ആശ്വാസമായ ഷൊർണൂർ-കണ്ണൂർ എക്സ്പ്രസിന്റെ സമയക്രമം നവംബർ ഒന്നു മുതൽ മാറ്റുന്നതിനെതിരേ യാത്രക്കാർ. പുതിയ സമയക്രമം ഷൊർണൂരിനും കോഴിക്കോടിനും ഇടയിലുള്ള സ്ഥിരം യാത്രക്കാരെ ബാധിക്കുമെന്ന് യാത്രക്കാരുടെ സംഘടനയായ മലബാർ ട്രെയിൻ പാസഞ്ചേഴ്‌സ് ഫോറം പറഞ്ഞു. നേരത്തേ ഒക്ടോബർ 31 വരെ അനുവദിച്ചിരുന്ന ഷൊർണൂർ-കണ്ണൂർ, കണ്ണൂർ-ഷൊർണൂർ എക്സ്‌പ്രസുകൾ രണ്ടുമാസത്തേക്കുകൂടി നീട്ടി റെയിൽവേ കഴിഞ്ഞ 24-ന് ഉത്തരവിറക്കിയിരുന്നു. ചൊവ്വ, ബുധൻ, വ്യാഴം, വെള്ളി ദിവസങ്ങളിൽ മാത്രം സർവീസ് നടത്തിയിരുന്ന തീവണ്ടികൾ ദിവസവും സർവീസ് നടത്താനും തീരുമാനിച്ചു. ഈ ഉത്തരവിൽ ഷൊർണൂർ-കണ്ണൂർ എക്സ്പ്രസിന്റെ (06031) സമയക്രമത്തിൽ മാറ്റം വന്നു. വൈകീട്ട് 3.40-ന് ഷൊർണൂരിൽ നിന്ന് പുറപ്പെടുന്ന ഷൊർണൂർ-കണ്ണൂർ എക്സ്പ്രസ് ഇനിമുതൽ മൂന്നുമണിക്കാണ് പുറപ്പെടുക.
പുതിയ സമയക്രമമനുസരിച്ച് പട്ടാമ്പി, കുറ്റിപ്പുറം, തിരൂർ, താനൂർ, പരപ്പനങ്ങാടി, ഫറോ ക്ക് എന്നിവിടങ്ങളിൽ അരമണിക്കൂർ മുതൽ മുക്കാൽ മണിക്കൂർ വരെ നേരത്തെയാണ് തീവണ്ടി എത്തുക. പട്ടാമ്പിയിൽ 3.54-ന് എത്തിയിരുന്നത് 3.14-നും തിരൂരിൽ 4.31-ന് എത്തിയിരുന്നത് 4.05-നും ഫറോക്കിൽ 5.15-ന് എത്തിയിരുന്നത് 4.41-നും എന്നിങ്ങനെയാണ് തീവണ്ടി എത്തുക. ഫറോക്കിനും കോഴിക്കോടിനുമിടയിലുള്ള സമയം 25 മിനിറ്റായിരുന്നത് 43 മിനിറ്റായി വർധിപ്പിക്കുകയും ചെയ്തു. കോഴിക്കോട് 5.30 -ന് എത്തിയിരുന്ന വണ്ടി അഞ്ചുമിനിറ്റ് നേരത്തെ 5.25-ന് എത്തുന്ന രീതിയിലാണ് പുതിയ സമയക്രമം. തീവണ്ടികൾ ദിവസവും സർവീസ് നടത്താനുള്ള തീരുമാനത്തെ സ്വാഗതം ചെയ്യുന്നതായും സ്ഥിരം യാത്രക്കാർക്ക് ബുദ്ധിമുട്ടില്ലാത്ത വിധം പഴയ സമയ ക്രമത്തിൽത്തന്നെ സർവീസ് നടത്തണമെന്നും മലബാർ ട്രെയിൻ പാസഞ്ചേഴ്‌സ് ഫോറം കൺവീനർ പി.കെ.സി ഫൈസൽ പറഞ്ഞു.
