മയ്യിൽ :- തെരുവുനായ ആക്രമണത്തിനെതിരായുള്ള ബോധവൽക്കരണ നാടകത്തിനിടെ നടനെ സ്റ്റേജിൽ കയറി നായ കടിച്ചു. കണ്ടക്കൈപപ്പമ്പിലെ നാടക പ്രവർത്തകനായ പി.രാധാകൃഷ്ണനാണ് കടിയേറ്റത്. കഴിഞ്ഞദിവസം രാത്രിയാണ് കണ്ടക്കൈ കൃഷ്ണപിള്ള സ്മാരക വായനശാലയിൽ രാധാകൃഷ്ണൻ തന്റെ ഏകപാത്ര നാടകമായ 'പേക്കാലം' അവതരിപ്പിച്ചത്.
നാടകത്തിൽ കുട്ടി തെരുവുനായ ആക്രമണത്തിന് ഇരയാകുന്ന രംഗം അഭിനയിക്കുന്നതിനിടെ നായ കുരയ്ക്കുന്ന ശബ്ദം പശ്ചാത്തലത്തിൽ ഉപയോഗിച്ചിരുന്നു. ഈ സമയത്താണ് നായയുടെ ആക്രമണമുണ്ടായത്. നായ വേദിയിൽ കയറിയതും ഇറങ്ങിയതും കാണികൾ കണ്ടെങ്കിലും നാടകത്തിന്റെ ഭാഗമാണെന്നു കരുതി പ്രതികരിച്ചില്ല. നായയുടെ കടിയേറ്റ രാധാകൃഷ്ണൻ പത്തു മിനിറ്റോളം വേദന സഹിച്ച് നാടകം പൂർത്തിയാക്കിയ ശേഷമാണ് സംഘാടകരെ വിവരമറിയിച്ചത്. തുടർന്ന് പരിയാരം ഗവ.മെഡിക്കൽ കോളജ് ആശുപത്രിയിൽ ചികിത്സതേടുകയും ചെയ്തു.
