മുംബൈ :- അടുത്തവർഷം ഇന്ത്യയിലും ശ്രീലങ്കയിലുമായി നടക്കുന്ന ടി20 ലോകകപ്പിന്റെ മത്സരക്രമം ഐസിസി ഇന്ന് മുംബൈയിൽ പുറത്തുവിടും. മുൻ ലോകകപ്പിലേതുപോലെ ഇത്തവണയും ഗ്രൂപ്പ് ഘട്ടത്തിൽ തന്നെ ഇന്ത്യ-പാകിസ്ഥാൻ പോരാട്ടമുണ്ട്. ഫെബ്രുവരി 15ന് കൊളംബോ പ്രേമദാസ സ്റ്റേഡിയത്തിലാവും ഇന്ത്യ-പാകിസ്ഥാൻ പോരാട്ടം. ഏഷ്യാ കപ്പിൽ ഫൈനലിൽ അടക്കം ഇന്ത്യയും പാകിസ്ഥാനും മൂന്ന് തവണ ഏറ്റുമുട്ടിയിരുന്നു. ഇതിൽ മൂന്നിലും ഇന്ത്യ ജയിച്ചു കയറി.
എന്നാൽ ഏഷ്യാ കപ്പിൽ കിരീടം നേടിയ ഇന്ത്യൻ ടീമിന് ഇതുവരെ കിരീടം സമ്മാനിക്കാൻ ഏഷ്യൻ ക്രിക്കറ്റ് കൗൺസിൽ തയാറായിട്ടില്ല. ഏഷ്യാ കപ്പിനിടെ പാക് താരങ്ങളുമായി ഹസ്തദാനം നടത്താൻ ഇന്ത്യൻ താരങ്ങൾ വിസമ്മതിച്ചതിന്റെ കൂടി പശ്ചാത്തലത്തിലാണ് ഏകദിന ലോകകപ്പിൽ ഇരു ടീമും വീണ്ടും ഏറ്റുമുട്ടാൻ ഒരുങ്ങുന്നത്. ഇന്ത്യക്കും പാകിസ്ഥാനും പുറമെ അമേരിക്കയും നെതർലൻഡ്‌സും നമീബിയയും ആയിരിക്കും ഇന്ത്യയുടെ ഗ്രൂപ്പിലെന്ന് ക്രിക് ഇൻഫോ റിപ്പോർട്ട് ചെയ്തു. ലോകകപ്പ് തുടങ്ങുന്ന ഫെബ്രുവരി ഏഴിന് മുംബൈയിൽ അമേരിക്കക്ക് എതിരെയായിരിക്കും ഇന്ത്യയുടെ ആദ്യ ഗ്രൂപ്പ് മത്സരം.
ഫെബ്രുവരി 12ന് ഡൽഹിയിൽ നമീബിയയെയും 15ന് പാകിസ്ഥാനെയും നേരിടുന്ന ഇന്ത്യ അവസാന ഗ്രൂപ്പ് മത്സരത്തിൽ 18ന് അഹമ്മദാബാദിൽ നെതർലൻഡ്‌സിനെ നേരിടും. ഗ്രൂപ്പ് ഘട്ടത്തിൽ ഒരു ദിവസം മൂന്ന് മത്സരങ്ങളുണ്ടായിരിക്കും. ഫെബ്രുവരി ഏഴ് മുതൽ മാർച്ച് എട്ടുവരെയായിരിക്കും ലോകകപ്പ്. ഇന്ത്യയിൽ കളിക്കില്ലെന്ന പാക് നിലപാടിനെ തുടർന്ന് പാകിസ്ഥാന്റെ മത്സരങ്ങളെല്ലാം കൊളംബോയിലും കാൻഡിയിലുമായിരിക്കും നടക്കുക. 2024ലെ ടി20 ലോകകപ്പ് മാതൃകയിൽ അഞ്ച് ടീമുകളെ നാലു ഗ്രൂപ്പുകളായിട്ടായിരിക്കും ടൂർണമെന്റ്. ഓരോ ഗ്രൂപ്പിലും മൂന്നിലെത്തുന്ന രണ്ട് ടീമുകൾ സൂപ്പർ 8 ലേക്ക് മുന്നിലേറും.
രണ്ട് ഗ്രൂപ്പുകളായി നടക്കുന്ന സൂപ്പർ എട്ടിൽ ഗ്രൂപ്പിലെ ആദ്യ രണ്ട് ടീമുകൾ സെമിയിലെത്തുന്ന രീതിയിലാണ് മത്സരക്രമം. ഇന്ത്യ സൂപ്പർ 8 എൽ എത്തിയാൽ ചെന്നൈ, കൊൽക്കത്ത, അഹമ്മദാബാദ് എന്നിവിടങ്ങളിലായിരിക്കും സൂപ്പർ 8 മത്സരങ്ങൾ. സെമിയിലെത്തിയാൽ മുംബൈയിലായിരിക്കും സെമി കളിക്കുക. പാകിസ്ഥാനോ ശ്രീലങ്കയോ യോഗ്യത നേടുന്നതിന് അനുസരിച്ച് കൊളംബോയ കൊൽക്കത്തയോ രണ്ടാം സെമിയുടെ വേദിയിയായി ഐസിസി തെരഞ്ഞെടുക്കും.
ആതിഥേയരായ ഇന്ത്യക്കും ശ്രീലങ്കക്കും പുറമെ അഫ്ഗാനിസ്ഥാൻ, ഓസ്ട്രേലിയ, ബംഗ്ലാദേശ്, ഇംഗ്ലണ്ട്, ദക്ഷിണാഫ്രിക്ക, യുണൈറ്റഡ് സ്റ്റേറ്റ്സ് ഓഫ് അമേരിക്ക, വെസ്റ്റ് ഇൻഡീസ്, ന്യൂസിലൻഡ്, പാകിസ്ഥാൻ, അയർലൻഡ്, കാനഡ, ഇറ്റലി, നെതർലാൻഡ്‌സ്, നമീബിയ, സിംബാബ്വെ, നേപ്പാൾ, ഒമാൻ, യുഎഇ ടീമുകളാണ് ലോകകപ്പിൽ പങ്കെടുക്കുക.
