ന്യൂഡൽഹി :- അനാവശ്യ (സ്പാം) മെസേജുകളും കോളുകളും വരുന്ന നമ്പറുകൾ ബ്ലോക് ചെയ്യുന്നതിനു പുറമേ 'ട്രായ് ഡിഎൻഡി ആപ്പി'ൽ (TRAI DND) റിപ്പോർട്ട് ചെയ്യണമെന്ന് ടെലികോം റെഗുലേറ്ററി അതോറിറ്റി (ട്രായ്) അഭ്യർഥിച്ചു. കഴിഞ്ഞ ഒരു വർഷത്തിൽ ഇത്തരത്തിൽ 21 ലക്ഷം നമ്പറുകൾ റദ്ദാക്കിയതായി ട്രായ്ചൂണ്ടിക്കാട്ടി. ഇത്തരത്തിൽ മെസേജുകൾ അയച്ച ഒരു ലക്ഷത്തോളം സ്ഥാപനങ്ങളെയും വ്യക്തികളെയും കരിമ്പട്ടികയിൽപ്പെടുത്തി. ട്രായ് ഡി എൻഡി ആപ്പിൽ പൊതുജനങ്ങൾ റിപ്പോർട്ട് ചെയ്‌തതിന്റെ അടിസ്ഥാനത്തിലായിരുന്നു നടപടിയെന്ന് അതോറിറ്റി അറിയിച്ചു.
സ്വന്തം സിം കാർഡ് സൈബർ തട്ടിപ്പുകൾക്കോ മറ്റ് നിയമവിരുദ്ധ പ്രവർത്തനങ്ങൾക്കോ ദുരുപയോഗം ചെയ്തതായി കണ്ടെത്തിയാൽ സിം ഉടമ നിയമനടപടി നേരിടേണ്ടിവരുമെന്ന് ടെലികോം വകുപ്പ് മുന്ന റിയിപ്പ് നൽകി. സ്വന്തം പേരിലുള്ള സിം കാർഡ് ദുരുപയോഗം ചെയ്യാൻ സാധ്യതയുള്ള മറ്റൊരാൾക്ക് കൈമാറരുത്. പഴയ ഫോണുകൾ വാങ്ങുമ്പോൾ അതിന്റെ ഐഎംഇഐ നമ്പറിൽ കൃത്രിമം കാണിച്ചിട്ടുണ്ടോയെന്ന് പരിശോധിച്ചുറപ്പാക്കുക. ഇതിനായി ടെലികോം വകുപ്പിന്റെ സഞ്ചാർസാഥി പോർട്ടൽ ഉപയോഗിക്കാം.
