കുറ്റ്യാട്ടൂർ:- കുറ്റ്യാട്ടൂർ ശ്രീ ശങ്കര വിദ്യാ നികേതൻ സീനിയർ സെക്കൻഡറി സ്കൂളിൽ നടന്ന ഭാരതീയ വിദ്യാ നികേതൻ കണ്ണൂർ ജില്ലാ കലോത്സവത്തിൽ നിവേദിത വിദ്യാലയം പുന്നാട് ജേതാക്കളായി. ജില്ലയിലെ 17 വിദ്യാലയങ്ങളിൽ നിന്നും ആയിരത്തിലധികം വിദ്യാർത്ഥികൾ കലോത്സവത്തിൽ പങ്കെടുത്തു. 612 പോയിന്റ് നേടിയ വിദ്യാലയം പുന്നാട് ഒന്നാംസ്ഥാനവും 6O8 പോയിന്റ് നേടിയ ശ്രീ ശങ്കര വിദ്യാനികേതൻ കുറ്റ്യാട്ടൂർ രണ്ടാംസ്ഥാനവും എ വി എസ് ടാഗോർ തലശ്ശേരി മൂന്നാം സ്ഥാനവും കരസ്ഥമാക്കി. നിവേദിത വിദ്യാലയം പുന്നാടിന്റെ പ്രിൻസിപ്പാൾ പ്രദീപ്കുമാറും വിദ്യാർത്ഥികളും ചേർന്ന് ട്രോഫി ഏറ്റുവാങ്ങി.
പ്രശസ്ത ഗായകനും സംഗീതജ്ഞനുമായ ഡോ. കാഞ്ഞങ്ങാട് രാമചന്ദ്രൻ ഭദ്രദീപം കൊളുത്തി കലോത്സവം ഉദ്ഘാടനം ചെയ്തു. ഇടൂഴി ഇല്ലം ആയുർവേദ ഫൗണ്ടേഷൻ രക്ഷാധികാരിയും സ്വാഗതസംഘം ചെയർമാനുമായ ഡോ.ഇടൂഴി ഭവദാസൻ നമ്പൂതിരി, കൊൽക്കത്ത സാഹ ഇൻസ്റ്റിറ്റ്യൂട്ട് Rtd.Sr. സയന്റിസ്റ്റും സ്വാഗതസംഘം ചെയർമാനുമായ ഡോ.പി.എം.ജി നമ്പീശൻ എന്നിവർ വിശിഷ്ടാതിഥികളായി. കുറ്റ്യാട്ടൂർ ശ്രീ ശങ്കര വിദ്യാനികേതൻ പ്രിൻസിപ്പാൾ സ്നേഹജ.കെ അധ്യക്ഷത വഹിച്ചു.
ദേശീയ കായിക ശാസ്ത്രമേളകളിൽ വിജയികളായ വിദ്യാർത്ഥികൾക്ക് ഉപഹാരം നൽകി. ശ്രീശങ്കരസേവ ട്രസ്റ്റ് ട്രസ്റ്റി സുബേദാർ മേജർ രാധാകൃഷ്ണൻ ടി.വി, ക്ഷേമ സമിതി പ്രസിഡണ്ട് കെ.നാരായണൻ കൊടോളിപ്രം, മാതൃസമിതി വൈസ് പ്രസിഡണ്ട് ദിവ്യ പ്രകാശ് എന്നിവർ ചടങ്ങിൽ ആശംസ അർപ്പിച്ച് സംസാരിച്ചു. സംഘാടക സമിതി ജോ. കൺവീനർ അർജുൻ മോഹനൻ നന്ദിയും പറഞ്ഞു.
