ദില്ലി :- ആധാർ കാർഡുമായി ബന്ധിപ്പിച്ചിട്ടുള്ള മൊബൈൽ നമ്പർ അപ്ഡേറ്റ് ചെയ്യാൻ ഇനി ആധാർ സേവാ കേന്ദ്രങ്ങളിൽ വലിയ ക്യൂ നിൽക്കേണ്ടതില്ല. ഒടിപിയും ഫേസ് ഓതൻ്റിക്കേഷനും വഴി വീട്ടിലിരുന്നുകൊണ്ട് ആധാർ മൊബൈൽ നമ്പർ പുതുക്കാനുള്ള ഫീച്ചർ ഉടൻ പുത്തൻ ആധാർ ആപ്പിൽ യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI) അവതരിപ്പിക്കും. ഈ സവിശേഷത ആധാർ ആപ്പിൽ വരുന്നതോടെ ആധാറുമായി ബന്ധിപ്പിച്ചിട്ടുള്ള മൊബൈൽ നമ്പർ അപ്ഡേറ്റ് ചെയ്യാൻ എൻറോൾമെന്റ് സെന്റർ സന്ദർശിക്കുകയോ ക്യൂവിൽ നിൽക്കുകയോ വേണ്ടിവരില്ല.
ആധാറുമായി ബന്ധിപ്പിച്ചിട്ടുള്ള മൊബൈൽ നമ്പർ ഇനി എളുപ്പത്തിൽ അപ്ഡേറ്റ് ചെയ്യാം
ആധാർ ആപ്പ് ഉപയോഗിച്ച് ഡിജിറ്റൽ വെരിഫിക്കേഷൻ മാർഗത്തിലൂടെ ഉടൻ തന്നെ വീട്ടിലിരുന്ന് ആധാർ മൊബൈൽ നമ്പർ അപ്ഡേറ്റ് ചെയ്യാൻ കഴിയുമെന്ന് യുണീക് ഐഡൻ്റിഫിക്കേഷൻ അതോറിറ്റി ഓഫ് ഇന്ത്യ ഔദ്യോഗിക എക്സ് ഹാൻഡിലിലൂടെ അറിയിച്ചു. ഒടിപിയും ഫേസ് ഓതന്റിക്കേഷനുമായിരിക്കും ആധാർ ആപ്പിൽ വെരിഫിക്കേഷനായി സ്വീകരിക്കുക. ആധാറുമായി ബന്ധിപ്പിച്ചിട്ടുള്ള മൊബൈൽ നമ്പർ അപ്ഡേറ്റ് ചെയ്യാൻ അംഗീകൃത ആധാർ സെൻററുകൾ സന്ദർശിക്കണമെന്ന നിലവിലെ നിയമത്തിൻ്റെ ആയാസം ഒഴിവാക്കുന്നതായിരിക്കും പുത്തൻ രീതി. മുതിർന്ന പൗരൻമാർക്കും, ഭിന്നശേഷിക്കാർക്കും, ഉൾപ്രദേശങ്ങളിൽ താമസിക്കുന്നവർക്കുമെല്ലാം ആധാർ സേവാ കേന്ദ്രങ്ങളിലെത്തി ആധാർ മൊബൈൽ നമ്പറിൽ മാറ്റം വരുത്തുന്നത് ബാലികേറാമലയായിരുന്നു ഇതുവരെ. ആധാർ എൻറോൾമെൻ്റ് കേന്ദ്രങ്ങളിലാവട്ടേ വലിയ ക്യൂവും നാളിതുവരെ ദൃശ്യമായിരുന്നു. അതേസമയം, ആധാർ അപ്ഡേറ്റുകളുടെ സങ്കീർണത കാരണം നിശ്ചിത അപ്പോയ്ൻമെൻ്റുകൾ മാത്രമേ ഈ ആധാർ സേവാ കേന്ദ്രങ്ങളിൽ ഓരോ ദിവസവും നൽകിയിരുന്നുള്ളൂ എന്നതും പൊതുജനങ്ങളെ വലച്ചിരുന്നു. എന്നാൽ ആധാറുമായി ബന്ധിപ്പിച്ചിട്ടുള്ള ഫോൺ നമ്പറുകൾ സ്മ‌ാർട്ട്ഫോണുകൾ ഉപയോഗിച്ച് ആധാർ ഉടമയ്ക്ക് തന്നെ അപ്ഡേറ്റ് ചെയ്യാനുള്ള സൗകര്യം വരുന്നതോടെ ഈ പ്രയാസങ്ങൾ കുറയുമെന്നാണ് പ്രതീക്ഷ.
പുത്തൻ ആധാർ ആപ്പ് ഡൗൺലോഡ് ചെയ്യണം
പുതിയ ആധാർ ആപ്പിൽ നിന്ന് നിലവിലെ മൊബൈൽ നമ്പറിലേക്കോ പുതിയ നമ്പറിലേക്കോ ഒടിപി അയച്ചുകൊണ്ടാണ് അപ്ഡേഷൻ പ്രക്രിയ തുടങ്ങേണ്ടത്. ആപ്പിലെ ബിൽട്ട്-ഇൻ സൗകര്യം വഴി ഫേസ് ഓതന്റിക്കേഷൻ പിന്നാലെ പൂർത്തീകരിക്കണം. കർശനമായ സുരക്ഷാ മാനദണ്ഡങ്ങൾ പാലിച്ചായിരിക്കും ഈ രണ്ട് പ്രക്രിയയും ആധാർ ആപ്പിൽ നടക്കുക. ആധാറുമായി ബന്ധിപ്പിച്ചിട്ടുള്ള മൊബൈൽ നമ്പർ അപ്ഡേറ്റ് ചെയ്യാനുള്ള ഓപ്ഷൻ ആധാർ ആപ്പിൽ യുഐഡിഎഐ ഉടൻ തന്നെ അവതരിപ്പിക്കും. ഇതിന് മുന്നോടിയായി, പുത്തൻ ആധാർ ആപ്പ് ഡൗൺലോഡ് ചെയ്യാൻ യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ ഏവരോടും ആവശ്യപ്പെട്ടു. ആധാർ ആപ്പ് ഐഒഎസ്, ആൻഡ്രോയ്‌ഡ് പ്ലാറ്റ്ഫോമുകളിൽ ലഭ്യമാണ്. മൊബൈൽ ഫോൺ വഴി നമ്പർ അപ്ഡേറ്റ് ചെയ്യാൻ ഫേസ് ഓതന്റിക്കേഷൻ പിന്തുണയുള്ള സ്‌മാർട്ട്ഫോൺ അനിവാര്യമാണ്.
