മലപ്പുറം :- പായസച്ചെമ്പിൽ വീണു പൊള്ളലേറ്റയാൾ ചികിത്സയിലിരിക്കെ മരിച്ചു. മലപ്പുറം ചേളാരി സ്വദേശി അയ്യപ്പൻ (55) ആണ് മരിച്ചത്. കഴിഞ്ഞ ഞായറാഴ്ച്ചയാണ് മലപ്പുറം പണിക്കോട്ട് പടിയിൽ ദാരുണമായ സംഭവം ഉണ്ടായത്. വിവാഹത്തിന് പായസം ഉണ്ടാക്കുമ്പോൾ അയ്യപ്പൻ തിളച്ച പായസത്തിലേക്ക് വീഴുകയായിരുന്നു. ഗുരുതരമായി പൊള്ളലേറ്റ അയ്യപ്പനെ കോഴിക്കോട് മെഡിക്കൽ കോളേജിൽ പ്രവേശിപ്പിച്ചിരുന്നു. ചികിത്സയിലിരിക്കെ ഇന്ന് മരണത്തിന് കീഴടങ്ങുകയായിരുന്നു.
ഞായറാഴ്ച പുലർച്ചെ ചേളാരി പാപ്പന്നൂരുള്ള ബന്ധുവിന്റെ കല്യാണ വീട്ടിലാണ് ദാരുണമായ സംഭവം നടന്നത്. പാചകത്തിന് സഹായിക്കുന്നതിനിടെ അയ്യപ്പൻ വലിയ ചെമ്പിൽ സൂക്ഷിച്ച തിളച്ച പായസ അടയിലേക്ക് വിഴുകയായിരുന്നു. ഉടൻ തന്നെ ബന്ധുക്കളും നാട്ടുകാരും ചേർന്ന് ഇദ്ദേഹത്തെ ആശുപത്രിയിലെത്തിച്ചു. ശരീരമാസകലം ഗുരുതരമായി പൊള്ളലേറ്റ നിലയിലായിരുന്നു ആശുപത്രിയിൽ എത്തിച്ചത്. തീവ്രപരിചരണ വിഭാഗത്തിൽ ചികിത്സ തുടരുന്നതിനിടെയാണ് ഇന്നലെ മരണം സംഭവിച്ചത്.
ഏറെ കാലം വിവധ സ്കൂളുകളിൽ സ്വകാര്യ ബസിൽ ഡ്രൈവറായിരുന്നു അയ്യപ്പൻ. ചേളാരിയിൽ ഓട്ടോ ഡ്രൈവറായും ജോലിചെയ്തിരുന്നു. നിലവിൽ ചേളാരി വിഎയുപി സ്കൂൾ ബസിലെ ഡ്രൈവറാണ്. മൃതദേഹം പോസ്റ്റ്മോർട്ടത്തിന് ശേഷം ഇന്ന് കുടുംബ ശ്മശാനത്തിൽ സംസ്കരിക്കും. ഭാര്യ: സരസ്വതി. സഹോദരങ്ങൾ : നാടിച്ചി, അമ്മു, ശ്യാമള, പരേതരായ കുട്ടി നാഗൻ, വേലായുധൻ.
