എടപ്പാൾ :- കെ.എസ്.ആർ.ടി.സിയുടെ സൂപ്പർഫാസ്റ്റ്, ഓർഡിനറി ബസുകളിൽ ടി.വി സ്ഥാപിക്കുന്നു. 32 ഇഞ്ച് ടി.വി കളാണ് സ്ഥാപിക്കുന്നത്. കോട്ടയം ആസ്ഥാനമായ കമ്പനിക്കാണ് കരാർ. ആദ്യഘട്ടത്തിൽ 500 ബസുകളിലാണ് ടി.വി സ്ഥാപിക്കുന്നത്. പിന്നീട് മറ്റു ബസുകളിലേക്കും വ്യാപിപ്പിക്കും. ടി.വിയിൽ പ്രദർശിപ്പിക്കുന്ന പരസ്യങ്ങളിലൂടെ വരുമാനം കണ്ടെത്തിയാണ് കരാർ കമ്പനി ഇവ സ്ഥാപിച്ച് പ്രവർത്തിപ്പിക്കുക. ബസ്സിൽ ഡ്രൈവർ സീറ്റിന് പിറകിലായി യാത്രക്കാർക്കെല്ലാം കാണാവുന്ന വിധത്തിൽ മുകളിലായാണ് ടി.വി സ്ഥാപിക്കുന്നത്. ടി.വിയിൽ വാർത്തയൊപ്പം, ബസ് സഞ്ചരിക്കുന്ന വഴിയിലെ വിവരങ്ങൾ, എത്തിയ സ്റ്റോപ്പ്, അടുത്ത സ്റ്റോപ്പ്, ബസ് സമയം, കെ.എസ്.ആർ.ടി.സിയെക്കുറിച്ചുള്ള മറ്റു വിവരങ്ങൾ എന്നിവയെല്ലാം അറിയാം.
കെ.എസ്.ആർ.ടി.സിക്ക് സാമ്പത്തിക ബാധ്യതയില്ലാതെ ടി.വി സ്ഥാപിക്കുന്നതും പ്രവർത്തിപ്പിക്കുന്നതുമടക്കം എല്ലാം കരാറെടുത്ത കമ്പനി ചെയ്യും വിധമാണ് പദ്ധതി. പ്രതിമാസം ലഭിക്കുന്ന വരുമാനത്തിൻ്റെ നിശ്ചിതശതമാനം തുക ലൈസൻസ് ഫീസായി കെ.എസ്.ആർ.ടി.സിക്ക് നൽകുകയും ചെയ്യും. നാനൂറോളം ബസുകളിൽ ടി.വി സ്ഥാപിച്ചു. ശേഷിക്കുന്നവയിൽ സ്ഥാപിക്കുന്ന ജോലികൾ നടക്കുന്നു. കൂടുതൽ വരുമാനം ലഭിക്കുന്നവരെ തിരഞ്ഞെടുത്ത് അവർക്ക് നൽകാനും ആലോചനയുണ്ട്. വീഡിയോ അടക്കമുള്ളവ കോർപ്പറേഷന്റെ അംഗീകാരത്തോടെ മാത്രമേ പ്രദർശിപ്പിക്കാൻ അനുവാദമുള്ളൂ.
