മയ്യിൽ:-വലിയ ജനറേറ്ററുമായി പോകുകയായിരുന്ന ലോറിക്ക് തീപിടിച്ചു. ലോറിയുടെ എൻജിനിൽനിന്ന് തീയുയർന്ന് കാബിൻ കത്തിനശിച്ചു. ഡ്രൈവർ പി.സി. റമീസിന്‌ (38) നിസ്സാര പരിക്കേറ്റു.
മയ്യിൽ കണ്ടക്കൈ റോഡ് കവലയ്ക്ക് സമീപം വ്യാഴാഴ്ച വൈകീട്ട് നാലിനായിരുന്നു സംഭവം. ഓടിക്കൊണ്ടിരുന്ന ലോറിയിൽനിന്ന് പുക ഉയരുന്നത് കണ്ടതോടെ വ്യാപാരികളുടെയും നാട്ടുകാരുടെയും സമയോചിത ഇടപെടലിൽ വൻദുരന്തം ഒഴിവായി. ഏച്ചൂരിലെ റാഫി ലൈറ്റ് ആൻഡ് സൗണ്ട് ഉടമ ഹാരിസിന്റേതാണ് ലോറി.
മുല്ലക്കൊടി ആയാർമുനമ്പ് ഉറൂസിനെത്തിച്ച ജനറേറ്റർ തിരിച്ചുകൊണ്ടുപോകുന്നതിനിടെയാണ് ലോറിക്ക് തീപിടിച്ചത്. ഷോർട്ട് സർക്യൂട്ട് മൂലമാണ് തീ പടർന്നതെന്നാണ് കരുതുന്നതെന്ന് ഡ്രൈവർ റമീസ് പറഞ്ഞു.
രക്ഷാപ്രവർത്തനത്തിന് മയ്യിൽ വ്യാപാരി വ്യവസായി സമിതി പ്രസിഡന്റ് എസ്. രാജേഷ്, വ്യാപാരിയായ പി. പ്രദീപൻ, എം.വി. അബൂബക്കർ, സന്തോഷ് തുടങ്ങിയവർ നേതൃത്വം നൽകി.
