ശ്രീകണ്ഠപുരം :- പയ്യാവൂർ ഊട്ടുത്സവത്തിൻ്റെ ഭാഗമായുള്ള ചൂളിയാട് നിവാസികളുടെ ഓമനക്കാഴ്ച ഇന്ന് വെള്ളിയാഴ്ച നടക്കും. തടത്തിൽക്കാവ്, ചമ്പോച്ചേരി മടപ്പുരക്കൽ, നല്ലൂർ, തൈവളപ്പ് എന്നിവിടങ്ങളിലെ കുഴികളിൽ പഴുക്കാൻവെച്ച അടുക്കൻ വാഴക്കുലകൾ വ്യാഴാഴ്ച രാവിലെ പുറത്തെടുത്ത് കുഴികൾക്ക് സമീപമുള്ള പന്തലുകളിൽ തയ്യാറാക്കിവെച്ചു.
വ്രതശുദ്ധിയോടെ ചുളിയാട് ദേശവാസികൾ വെള്ളിയാഴ്ച രാവിലെ 10-ന് തടത്തിൽക്കാവിൽനിന്ന് പഴക്കുലയുമേന്തി പയ്യാവൂരിലേക്ക് പുറപ്പെടും. പുലർച്ചെ പയ്യാവൂർ ക്ഷേത്രത്തിൽ നിരവധി നെയ്യമൃത് മഠങ്ങളിൽ വ്രതശുദ്ധിയോടെ കഴിയുന്നവരുടെ നെയ്യൊപ്പിക്കലും നടക്കും. ഉച്ചയ്ക്ക് രണ്ടിന് ആനപ്പുറത്ത് തിടമ്പെഴുന്നള്ളത്തും തിരുനൃത്തവും കോമരത്തച്ചന്റെയും നെയ്യമൃതുകാരുടെയും കുഴിയടുപ്പിൽ നൃത്തവും. വൈകീട്ട് നാലിന് ഓമനക്കാഴ്ച പയ്യാവൂർ ക്ഷേത്രത്തിലെത്തും. ഓമനക്കാഴ്ച ക്ഷേത്ര ത്തിൽ സമർപ്പിക്കുന്നതോടെ കാളപ്പുറത്ത് അരിയുമായി എത്തിയ കുടകർ മടങ്ങും. ശനിയാഴ്ച ഉച്ചയ്ക്ക് നെയ്യമൃതുകാരുടെ അടീലൂണ് നടക്കും. തുടർന്ന് ഇവർ വീടുകളിലേക്ക് മടങ്ങും. ഉത്സവം 25-ന് സമാപിക്കും.
