.webp)
ചെന്നൈ :- ദക്ഷിണ റെയിൽവേ 15 തീവണ്ടികളിൽ സ്ലീപ്പർ കുറച്ച് ജനറൽ കോച്ചുകൾ കൂട്ടുന്നു. ചെന്നൈ സെൻട്രൽ-തിരുവനന്തപുരം സൂപ്പർ ഫാസ്റ്റ് (12695/12696), ചെന്നൈ സെൻട്രൽ-ആലപ്പുഴ സൂപ്പർ ഫാസ്റ്റ് (22639/22640), തിരുവനന്തപുരം സെൻട്രൽ-മധുര അമൃത എക്സ്പ്രസ് (16343/16344), കൊച്ചുവേളി-നിലമ്പൂർ രാജ്യറാണി എക്സ്പ്രസ്(16349/16350), എറണാകുളം - വേളാങ്കണ്ണി(16361/16362) എക്സ്പ്രസ്, പുതുച്ചേരി-മംഗളൂരു സെൻട്രൽ എക്സ്പ്രസ്(16855/16856), പുതുച്ചേരി-മംഗളൂരു സെൻട്രൽ എക്സ്പ്രസ് (16857/16858), ചെന്നൈ സെൻട്രൽ-പാലക്കാ ട് സൂപ്പർ ഫാസ്റ്റ് (22651/22652)ഉൾപ്പെടെയുള്ള 15 തീവണ്ടികളിലാണ് 2025 ജനുവരി മുതൽ സ്ലീപ്പർ കോച്ചുകൾ കുറച്ച് ജനറൽ കോച്ചുകൾ കൂട്ടുന്നത്.
ചെന്നൈ സെൻട്രൽ - ആലപ്പുഴ സൂപ്പർ ഫാസ്റ്റ് എക്സ്പ്രസ്, ചെന്നൈ സെൻട്രൽ - തിരുവനന്തപുരം സൂപ്പർ ഫാസ്റ്റ് എന്നിവയിൽ രണ്ടു വീതം സ്ലീപ്പർ കോച്ചുകൾ കുറയ്ക്കുമ്പോൾ ഒരു ജനറൽ കോച്ച് മാത്രമേ കൂട്ടുന്നുള്ളൂ. മറ്റ് തീവണ്ടികളിൽ ഒരോ സ്ലീപ്പർ കോച്ചുകൾ കുറച്ച് ഒരു ജനറൽ കോച്ചാണ് കൂട്ടുന്നത്. കോച്ചുകൾ കുറയ്ക്കുന്നതിന് റെയിൽവേ കൃത്യമായി മറുപടി നൽകുന്നില്ല.
സ്ലീപ്പർ കോച്ചുകൾ വെട്ടികുറച്ച നടപടി കേരളത്തിലേക്കുള്ള യാത്രയെ പ്രതികൂലമായി ബാധിക്കും. ഈ വർഷം ജൂലായ് മാസത്തിൽ 10,000 ജനറൽ കോച്ചുകൾ പുതുതായി നിർമിക്കുമെന്ന് റെയിൽവേ മന്ത്രി അശ്വിനി വൈഷ്ണവ് പറഞ്ഞിരുന്നു. തിരക്ക് കുറയ്ക്കാൻ കൂടുതൽ ജനറൽ കോച്ചുകൾ കൂട്ടിച്ചേർക്കുമെന്നും പറഞ്ഞിരുന്നു. എന്നാൽ സ്ലീപ്പർ കോച്ചുകൾ കുറയ്ക്കുന്നകാര്യം വ്യക്തമാക്കിയിരുന്നില്ല.
