രൂപയുടെ വിനിമയ നിരക്ക് കൈകാര്യം ചെയ്യുന്ന രീതിയിൽ നിർണായകമായ മാറ്റം വരുത്തി അന്താരാഷ്ട്ര നാണയ നിധി. രൂപയുടെ നിലവിലെ വിനിമയ സംവിധാനം ഇനി 'സ്ഥിരതയുള്ളത്' എന്ന വിഭാഗത്തിൽ നിന്ന് 'ക്രമേണ മാറുന്നത്' എന്ന പുതിയ ലേബലിലേക്ക് മാറ്റിയതായി ഐഎംഎഫ് പ്രഖ്യാപിച്ചു. രൂപയുടെ വിനിമയ നിരക്കിലെ ചാഞ്ചാട്ടം വർധിച്ചതിനെ തുടർന്നാണ് ഈ മാറ്റം. വിപണിയിൽ ഡോളറിനെതിരെ രൂപ കൂടുതൽ സ്വതന്ത്രമായി ചലിക്കുന്നുണ്ട് എന്നതിന്റെ സൂചനയാണിത്.
എന്താണ് 'ക്രമേണ മാറുന്നത്' എന്നതിന്റെ അർത്ഥം?
ഒരു കറൻസി ദീർഘകാലാടിസ്ഥാനത്തിൽ ഒരു പ്രത്യേക ട്രെൻഡ് ലൈനിലൂടെ പതുക്കെ നീങ്ങുന്നു.
ഇടപാടുകാരായ രാജ്യങ്ങളിലെ പണപ്പെരുപ്പ നിരക്കിലെ വ്യത്യാസങ്ങൾക്കനുസരിച്ച് ചെറിയ, സ്ഥിരമായ മാറ്റങ്ങൾ വരുത്തുന്നു.
കഴിഞ്ഞ ആറ് മാസമായി കറൻസി വിനിമയ നിരക്ക് 2% എന്ന പരിധിയിൽ ഒതുങ്ങിനിൽക്കുന്നു.
മുമ്പ് 'സ്ഥിരതയുള്ളത്' എന്നായിരുന്നു രൂപയെ ഐഎംഎഫ് വിശേഷിപ്പിച്ചിരുന്നത്.
രൂപയുടെ വിനിമയ നിരക്ക് ഒരു പ്രത്യേക പരിധിക്കുള്ളിൽ നിലനിർത്താൻ ആർബിഐ നിരന്തരം ഇടപെടുന്നു എന്നായിരുന്നു അതിന്റെ അർത്ഥം. എന്നാൽ, ഇപ്പോഴത്തെ മാറ്റം സൂചിപ്പിക്കുന്നത്, ആർബിഐയുടെ ഇടപെടൽ കുറഞ്ഞതിനാൽ രൂപയ്ക്ക് കൂടുതൽ 'ചലന സ്വാതന്ത്ര്യം' ലഭിച്ചിട്ടുണ്ട് എന്നാണ്.
രൂപയുടെ ചാഞ്ചാട്ടം എന്തുകൊണ്ട് വർധിച്ചു?
ഒരു വർഷത്തിനിടെ രൂപയുടെ മൂല്യത്തിലെ ചാഞ്ചാട്ടം 5% കടന്നു. ഇതിൻ്റെ പ്രധാന കാരണം, വിപണിയിലെ ആർബിഐയുടെ ഇടപെടൽ കുറച്ചതാണ്. എന്നാൽ, കഴിഞ്ഞ ആഴ്ച രൂപയുടെ മൂല്യം റെക്കോർഡ് താഴ്ചയായ 89.49-ൽ എത്തിയപ്പോൾ ആർബിഐ കരുതൽ ധനശേഖരത്തിൽ നിന്ന് ഡോളർ വിറ്റ് വിപണിയിൽ ഇടപെട്ടു.
ഈ വർഷം മാത്രം രൂപയുടെ മൂല്യം 4% ഇടിഞ്ഞു. യുഎസ് ഏർപ്പെടുത്തിയ 50% തീരുവ മൂലം കയറ്റുമതി മേഖലയ്ക്ക് തിരിച്ചടി നേരിട്ടതാണ് ഇതിന് ഒരു കാരണം.
