കാലിഫോർണിയ :- ആപ്പിളിന്റെ ചരിത്രത്തിലെ കന്നി ഫോൾഡബിൾ ഐഫോണിന് അണ്ടർ-ഡിപ്ലെ ക്യാമറയുണ്ടായിരിക്കുമെന്ന് സ്ഥിരീകരിക്കാത്ത റിപ്പോർട്ടുകൾ. ആപ്പിളിന്റെ എതിരാളികളായ സാംസങ് മുമ്പുതന്നെ അണ്ടർ-ഡിപ്ലെ ക്യാമറകൾ അവതരിപ്പിച്ചെങ്കിലും 24-മെഗാപിക്സലിന്റെ ഉയർന്ന റെസലൂഷനിലുള്ള അണ്ടർ-ഡിപ്ലെ സെൻസർ ആപ്പിൾ അവതരിപ്പിക്കാനൊരുങ്ങുന്നു എന്നതാണ് ഏറ്റവും വലിയ പ്രത്യേകത. സ്ക്രീനിന്റെ മുകൾഭാഗത്തായി ക്യാമറ നോച്ച് കാണുന്ന പതിവ് രീതിക്ക് ബദലായാണ് അണ്ടർ-ഡിപ്ലെ ക്യാമറ ഐഫോൺ ഫോൾഡിലേക്ക് വരിക. ഫേസ് ഐഡി ഉൾപ്പെടുത്താൻ സാധ്യതയില്ലാത്തതിനാൽ സൈഡ്-മൗണ്ടഡ് ഫിംഗർപ്രിൻ്റ് സെൻസറും ആപ്പിളിന്റെ ഐഫോൺ ഫോൾഡിലേക്ക് വന്നേക്കും.
ഐഫോൺ ഫോൾഡ്: 24-മെഗാപിക്സൽ അണ്ടർ-ഡിസ്പ്ലെ ക്യാമറ
ഐഫോൺ ഫോൾഡ് എന്ന് അനൗദ്യോഗികമായി അറിയപ്പെടുന്ന ആപ്പിളിന്റെ ഫോൾഡബിൾ സ്‌മാർട്ട്ഫോൺ 2026-ൽ പുറത്തിറങ്ങുമെന്നാണ് സൂചന. ഐഫോൺ 18 പ്രോ, ഐഫോൺ എയർ 2 എന്നിവയ്ക്കൊപ്പമായിരിക്കും ഐഫോൺ ഫോൾഡ് വിപണിയിലെത്തുക. ഇത് ചരിത്രത്തിലെ ആദ്യ ഫോൾഡബിൾ ഐഫോണായിരിക്കും. ഫോൾഡബിൾ സ്മ‌ാർട്ട്ഫോണുകളുടെ വിപണിയിൽ സാംസങിനുള്ള മേൽക്കൈ മറികടക്കുക എന്ന വലിയ ലക്ഷ്യം ആപ്പിളിന്റെ മനസിലുണ്ട്. അതിനാൽ തന്നെ കന്നി ഐഫോൺ ഫോൾഡിൽ തന്നെ മികച്ച ഫീച്ചറുകളും സവിശേഷതകളും ഉൾപ്പെടുത്താനാണ് ആപ്പിളിൻ്റെ ശ്രമം. ഐഫോൺ ഫോൾഡിൽ വരുമെന്ന് പ്രതീക്ഷിക്കുന്ന അണ്ടർ-ഡിപ്ലെ ക്യാമറ 24Mpx 6P ആയിരിക്കുമെന്നും പറയപ്പെടുന്നു. സാംസങ് ഗാലക്സി സ്ലെഡ് ഫോൾഡ് 3 മുതൽ അണ്ടർ-ഡിസ്പ്ലെ ക്യാമറകൾ ഉൾപ്പെടുത്തിയിട്ടുണ്ടെങ്കിലും അത് 4 മെഗാപിക്‌സലിൻ്റെ ചെറിയ സെൻസറാണ്. 2026 മധ്യത്തോടെ വിപണിയിൽ എത്താനിരിക്കുന്ന ഗാലക്സി സെഡ് ഫോൾഡ് 8-ൽ പോലും 24 എംപിയുടെ അണ്ടർ-ഡിപ്ലെ ക്യാമറയുണ്ടാവാൻ സാധ്യതയില്ല.
ഐഫോൺ ഫോൾഡ് എപ്പോൾ പുറത്തിറങ്ങും?
ഐഫോൺ ഫോൾഡിൽ 48-മെഗാപികസലിൻ്റെ ഇരട്ട റിയർ ക്യാമറകളുണ്ടാകും എന്ന ലീക്കുകളും പുറത്തുവന്നിട്ടുണ്ട്. അതേസമയം, ഇതെല്ലാം ആപ്പിൾ വിവരങ്ങൾ റിപ്പോർട്ട് ചെയ്യുന്ന പ്രമുഖ രാജ്യാന്തര മാധ്യമങ്ങളുടെ വാർത്തയിലെ വിശദാംശങ്ങളാണ്. ഐഫോൺ ഫോൾഡ് എപ്പോൾ പുറത്തിറങ്ങുമെന്നോ, എന്തൊക്കെയായിരിക്കും ഫോൾഡബിൾ ഐഫോണിന്റെ സ്പെസിഫിക്കേഷനുകളെന്നോ ആപ്പിൾ ഇതുവരെ സ്ഥിരീകരിച്ചിട്ടില്ല. എങ്കിലും ഐഫോൺ ഫോൾഡ് പുറത്തിറക്കാനുള്ള ആലോചനകൾ ആപ്പിൾ തകൃതിയായി നടത്തുന്നുവെന്നാണ് സപ്ലൈ ചെയിൻ വിവരങ്ങൾ വ്യക്തമാക്കുന്നത്. ഐഫോൺ 18 മോഡലുകളിൽ 24-മെഗാപിക്സലിന്റെ സെൽഫി ക്യാമറകളുണ്ടാകുമെന്ന സൂചനകളും പുറത്തായി. ഇതിലും ആപ്പിളിന്റെ ഭാഗത്ത് നിന്ന് സ്ഥിരീകരണം ഉടൻ പ്രതീക്ഷിക്കേണ്ടതില്ല.
