ഡെബിറ്റ്/ക്രെഡിറ്റ് കാർഡുകളിൽ ഓട്ടോപേ സംവിധാനം ഉപയോഗിക്കാറുണ്ടോ? എങ്കിൽ അതിന്റെ ഏറ്റവും പുതിയ നിയമങ്ങളെക്കുറിച്ചും എങ്ങനെ സുരക്ഷിതമായി ഉപയോഗിക്കാമെന്നും അറിഞ്ഞിരിക്കണം. പ്രതിമാസമുള്ള ബില്ലുകളും മറ്റും അടയ്ക്കേണ്ട തീയതി മറക്കുന്നവർക്ക് ഏറെ ഉപകാരപ്രദമാണ് ഈ സൗകര്യം. ഓട്ടോമാറ്റിക് പേയ്മെന്റ്റ് സംവിധാനമായ ഇ-മാൻഡേറ്റ് അഥവാ ബാങ്കിന്റെ ഭാഷയിൽ സ്റ്റാൻഡിങ് ഇൻസ്ട്രക്ഷൻ റിസർവ് ബാങ്ക് നിയമങ്ങൾക്കനുസരിച്ചാണ് പ്രവർത്തിക്കുന്നത്. ഈ നിയമങ്ങളിൽ കാലാകാലങ്ങളിൽ മാറ്റങ്ങൾ വരുത്താറുണ്ട്. ഉദാഹരണത്തിന്, ക്രെഡിറ്റ് കാർഡ് ബിൽ 1 ലക്ഷത്തിൽ കൂടുതലാണെങ്കിൽ ഓട്ടോപേ സംവിധാനം പ്രവർത്തിക്കില്ല.
എങ്ങനെ ഓട്ടോപേ തുടങ്ങാം ? എന്തൊക്കെയാണ് പ്രധാന സവിശേഷതകൾ ?
ഓട്ടോപേ തുടങ്ങാനുള്ള നടപടികൾ ലളിതമാണ്. വ്യാപാരിയുടെ വെബ്സൈറ്റിലോ ആപ്പിലോ നേരിട്ടോ അല്ലെങ്കിൽ നിങ്ങളുടെ ബാങ്കിന്റെ ഡെബിറ്റ്/ക്രെഡിറ്റ് കാർഡ് വഴിയോ 'സ്റ്റാൻഡിങ് ഇൻസ്ട്രക്ഷൻ' രജിസ്റ്റർ ചെയ്യാം. ടെലികോം സേവനദാതാക്കൾ, ഒ.ടി.ടി. പ്ലാറ്റ്ഫോമുകൾ, ഇൻഷുറൻസ് കമ്പനികൾ, വൈദ്യുതി, ഗ്യാസ്, വെള്ളം തുടങ്ങിയ യൂട്ടിലിറ്റി സേവന ദാതാക്കൾ എന്നിവർക്കെല്ലാം ഓട്ടോപേ സൗകര്യം സജ്ജമാക്കാം. ഓട്ടോപേയിൽ ഫിക്സഡ് മാൻഡേറ്റും വാരിയബിൾ മാൻഡേറ്റും ഉണ്ട്.
ഫിക്സഡ് മാൻഡേറ്റ് : ബില്ലിന്റെ തുക എപ്പോഴും നിശ്ചിതമായിരിക്കും (ഉദാഹരണത്തിന്: ഒ.ടി.ടി പ്ലാറ്റ്ഫോമിന്റെ പ്ലാൻ).
വാരിയബിൾ മാൻഡേറ്റ് : ഇടപാട് സ്ഥിരമായിരിക്കും, എന്നാൽ ബിൽ തുക മാറും (ഉദാഹരണത്തിന്: വൈദ്യുതി ബില്ലുകൾ).
ഡെബിറ്റ് കാർഡ് ഉപയോഗിക്കുന്നവർ അക്കൗണ്ടിൽ മതിയായ പണമുണ്ടെന്ന് ഉറപ്പാക്കണം. പണമില്ലാതെ ഓട്ടോപേ പരാജയപ്പെട്ടാൽ, ബാങ്കുകൾ ഈടാക്കുന്ന പിഴ സാധാരണയായി അടയ്ക്കേണ്ട തുകയുടെ 2% അല്ലെങ്കിൽ കുറഞ്ഞത് 500 രൂപ ആണ്. ഇത് ഓരോ ബാങ്കിനും വ്യത്യാസപ്പെടാം. രജിസ്റ്റർ ചെയ്ത ശേഷം 7 ദിവസത്തിനകം ഓട്ടോപേ സംവിധാനം സജീവമാകും.
ഓട്ടോപേ സംബന്ധിച്ച് ആർ.ബി.ഐ പുറത്തിറക്കിയ സുരക്ഷാ മാർഗ്ഗനിർദ്ദേശങ്ങൾ
ആദ്യം 'ഇ-മാൻഡേറ്റ് രജിസ്റ്റർ ചെയ്യണം.
15,000 രൂപ വരെയുള്ള ഇടപാടുകൾക്ക് ഒ.ടി.പി.യുടെ ആവശ്യമില്ലാതെ പണം ഈടാക്കാം.
തുക 15,000 രൂപയിൽ കൂടുതലാണെങ്കിൽ, പണം എടുക്കുന്നതിന് മുൻപ് ഒ.ടി.പി. മുഖേനയുള്ള വെരിഫിക്കേഷൻ ആവശ്യമാണ്.
ഇൻഷുറൻസ്, മ്യൂച്വൽ ഫണ്ടുകൾ എന്നിവയുടെ കാര്യത്തിൽ ഒ.ടി.പി. വെരിഫിക്കേഷൻ വേണ്ട തുകയുടെ പരിധി 1 ലക്ഷം രൂപ ആണ്.
ക്രെഡിറ്റ് കാർഡ് ബിൽ പരിധി: ക്രെഡിറ്റ് കാർഡ് ബിൽ അടയ്ക്കുന്നതിനുള്ള ഓട്ടോപേ സൗകര്യം 1 ലക്ഷം വരെയുള്ള തുകയ്ക്ക് മാത്രമേ പ്രവർത്തിക്കൂ. അതിൽ കൂടുതലാണെങ്കിൽ ഒ.ടി.പി. നൽകിയ ശേഷം മാത്രമേ ബിൽ അടയ്ക്കാൻ സാധിക്കൂ.
