കണ്ണൂർ :- ജില്ലാ അഗ്രി ഹോർട്ടി കൾച്ചർ സൊസൈറ്റി പോലീസ് മൈതാനത്ത് സംഘടിപ്പിക്കുന്ന കണ്ണൂർ 'പുഷ്പോത്സവം 2026' നാളെ തുടക്കമാകും. ജനുവരി 22 ന് വൈകുന്നേരം 6 മണിക്ക് കഥാകൃത്ത് ടി.പദ്മനാഭൻ ഉദ്ഘാടനം ചെയ്യും. കളക്ടറും സൊസൈറ്റി പ്രസിഡൻ്റുമായ അരുൺ കെ.വിജയൻ അധ്യക്ഷനാവും. ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യൻ, മേയർ പി.ഇന്ദിര എന്നിവർ മുഖ്യാതിഥികളാകും. ഈ വർഷത്തെ സംസ്ഥാന കൃഷി അവാർഡ് ജേതാവ് എൻ.വി രാഹുലിനെ ചടങ്ങിൽ ആദരിക്കും. കേരളത്തിനകത്തു നിന്നും ഇതര സംസ്ഥാനങ്ങളിൽ നിന്നുമുള്ള നഴ്സറി സ്റ്റാളുകളിൽ വൈവിധ്യമാർന്ന ചെടികളും മറ്റു നടീൽ വസ്തുക്കളും ഔഷധസസ്യങ്ങളും ലഭ്യമാകും. 12,000 ചതുരശ്ര അടിയിൽ ഒരുക്കുന്ന വർണോദ്യാനം പുഷ്പോത്സവത്തിൻ്റെ ഏറ്റവും ആകർഷണീയമായ ഘടകമാകും. ആറളം ഫാം, കരിമ്പം ഫാം, വെജിറ്റബിൾ ആൻഡ് ഫ്രൂട്ട് പ്രമോഷൻ കൗൺസിൽ, അനർട്ട്, റെയ്ഡ്കോ എന്നിവയുടെ പവലിയനുകളും പുഷ്പോത്സവ നഗരിയിൽ ഒരുക്കും. ഫുഡ് കോർട്ടും സജ്ജമാക്കിയിട്ടുണ്ട്. കുട്ടികൾക്കുള്ള അമ്യൂസ്മെന്റ് പാർക്കും പുഷ്പോത്സവ നഗരിയിലുണ്ടാകും.
പുഷ്പോത്സവത്തിൻ്റെ ഭാഗമായി ജില്ലയിലെ വിദ്യാർഥികൾക്കായി ചിത്രരചനാ മത്സരം, വിദ്യാലയങ്ങൾ, വീടുകൾ എന്നിവിടങ്ങളിൽ പൂന്തോട്ട, പച്ചക്കറിത്തോട്ട മത്സരങ്ങൾ, വെജിറ്റബിൾ കാർവിങ് ക്ലാസുകൾ, മൈലാഞ്ചിയിടൽ, ഓലമെടയൽ, പുഷ്പറാണി, പുഷ്പരാജ മത്സരങ്ങൾ, പുഞ്ചിരിമത്സരം, കാർഷിക ഫോട്ടോഗ്രഫി, വാട്സാപ് സ്റ്റാറ്റസ് മത്സരങ്ങൾ തുടങ്ങിയ മത്സരങ്ങളും സംഘടിപ്പിച്ചിട്ടുണ്ട്. അതോടൊപ്പം മികച്ച നഴ്സറി ഡിസ്പ്ലെ തയ്യാറാക്കുന്ന സ്റ്റാൾ ഉടമകൾക്ക് പ്രത്യേക സമ്മാനവും നൽകും. 70 രൂപയാണ് പ്രവേശന ഫീസ്. അഞ്ചുവയസിന് താഴെ പ്രായമുള്ള കുട്ടികൾക്കും 80 വയസ് കഴിഞ്ഞവർക്കും പ്രവേശനം സൗജന്യമാണ്. ഫെബ്രുവരി മൂന്നിന് വൈകുന്നേരം നടക്കുന്ന സമാപന പരിപാടി മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്യും. മത്സരവിജയികൾക്ക് സിറ്റി പോലീസ് കമ്മിഷണർ നിതിൻ രാജ് സമ്മാനങ്ങൾ വിതരണം ചെയ്യും.
