കണ്ണൂർ :- ബൈക്കിൽ കറങ്ങി പെൺകുട്ടികളെ ശല്യം ചെയ്യുന്ന ഇതര സംസ്ഥാന തൊഴിലാളിയെ കണ്ണൂർ ടൗൺ പോലീസ് പിടികൂടി. രാജസ്ഥാൻ സ്വദേശി സതീഷ് ജൻഗമിനെ (26) ആണ് ടൗൺ സ്റ്റേഷൻ പോലീസ് ഇൻസ്പെക്ടർ പി.എ ബിനു മോഹനും സംഘവും പിടികൂടിയത്.
രണ്ടാം തീയതി എളയാവൂരിൽ വീട്ടിലേക്ക് പോകുകയായിരുന്ന വിദ്യാർഥിനിയെ ബൈക്കിൽ പിന്തുടർന്നെത്തി പ്രതി അപമാനിക്കാൻ ശ്രമിച്ചിരുന്നു. തൊട്ടടുത്ത ദിവസം രാവിലെയും പ്രതി പെൺകുട്ടിയെ ശല്യം ചെയ്ത‌തോടെ ടൗൺ പോലീസിൽ പരാതി നൽകുകയായിരുന്നു. വിദ്യാർത്ഥിനിയുടെ പരാതിയിൽ കേസെടുത്ത കണ്ണൂർ ടൗൺ പോലീസ് പ്രദേശത്തെ നിരീക്ഷണ ക്യാമറാ ദൃശ്യങ്ങൾ പരിശോധിച്ച് ബൈക്ക് നമ്പർ തിരിച്ചറിഞ്ഞ് മണിക്കൂറുകൾക്ക് ഉള്ളിൽ പ്രതിയെ പിടികൂടി. തുടർന്ന് ബൈക്ക് കണ്ടെത്തി കസ്റ്റഡിയിൽ എടുത്തു.
ഇക്കഴിഞ്ഞ ഡിസമ്പറിൽ തളിപ്പറമ്പിലും സമാനമായ രീതിയിൽ ഒരു പെൺകുട്ടിയെ അപമാനിച്ചു ബൈക്കിൽ രക്ഷപ്പെട്ടത് ഇയാളാണെന്ന് ചോദ്യം ചെയ്യലിൽ ടൗൺ പോലീസ് കണ്ടെത്തി. പ്രതിയെ പിടികൂടിയ പോലീസ് സംഘത്തിൽ എസ്.ഐ ഷമീൽ, രാജേഷ്, ഷിനോജ്, നാസർ, റമീസ്, സനൂപ്, ഷിജു, ഷൈജു എന്നിവരും ഉണ്ടായിരുന്നു.
