തിരുവനന്തപുരം :- ശബരിമല ദർശനത്തിന് ഓൺലൈൻ വഴി നേരത്തേ മുറി ബുക്ക് ചെയ്ത ശേഷം യാത്രാതടസ്സങ്ങൾ മൂലം വൈകിയെത്തുന്നവർക്ക് ഇനി താമസ സൗകര്യം നഷ്ടമാകില്ല. വൈകിയെത്തുന്നവർക്കായി പമ്പയിൽ പുതിയ ചെക്ക് ഇൻ കൗണ്ടർ തുറക്കാനാണു തീരുമാനം. പരിഷ്കാരം ഇത്തവണ മുതൽ നടപ്പാക്കും. വെർച്വൽ ക്യുവിനൊപ്പമാണ് ഇതരസംസ്ഥാനങ്ങളിൽ നിന്നുള്ള തീർഥാടകരടക്കം താമസസൗകര്യവും ബുക്ക് ചെയ്യുന്നത്. കൂടുതൽ ഭക്‌തജന സൗഹൃദമാക്കുന്ന വെർച്വൽ ക്യു വെബ്സൈറ്റിലുടെ സേവനങ്ങൾ വിപുലമാക്കുന്നതിന്റെ ഭാഗമായാണു തീരുമാനമെന്നു തിരുവിതാംകൂർ ദേവസ്വം ബോർഡ് പ്രസിഡന്റ് പി.എസ് പ്രശാന്ത് പറഞ്ഞു.
ദർശനം, വഴിപാട്, പ്രസാദം, താമസം തുടങ്ങിയ കാര്യങ്ങളിലാണു പ്രധാനമായും സേവനങ്ങൾ ലഭിക്കുക. ദർശനത്തിനുള്ള വെർച്വൽ ക്യൂ ബുക്കിങ് തടസ്സപ്പെട്ടാലും താൽപര്യമെങ്കിൽ പ്രസാദം ലഭിക്കും. പ്രസാദം വേണ്ടെങ്കിൽ ബുക്ക് ചെയ്തയാളുടെ അക്കൗണ്ടിലേക്കു പണം തിരികെനൽകും. പമ്പയിലും നിലയ്ക്കലിലും വൈഫൈ സംവിധാനം ആലോചനയിലുണ്ട്. സന്നിധാനത്ത് പതിനെട്ടാംപടിയിലും സോപാനത്തും ക്ഷേത്രമുറ്റത്തും മൊബൈൽ ഫോൺ ഉപയോഗത്തിനു നിയന്ത്രണമുണ്ടാകും.
